Aña aki lo tin menos permiso pa bende klapchi compara cu aña pasa

E aña aki lo bay tin menos bendedo di klapchi, pero asina mes na caminda tin hopi mas klapchi. Un total di mas of menos 83 permiso di klapchi a keda pidi pa 2015. Sr. Frido Dirksz di departamento di prevencion di bombero a indica cu pa e motibo aki e comision di klapchi di su banda, lo bay cuminsa traha riba diferente punto pa asina tin un miho maneho riba e tereno di klapchi pa futuro.

Compara cu aña pasa cu tabata 94 peticion pa bende klapchi, e cantidad a baha. Aunke cu tabata tin 94 peticion, un total di 77 a wordo uza. E aña aki yega na un total di mas of menos 83 permiso. A reuni tres siman atras unda cu tabata tin 77, pero despues a bin extra peticion. Probablemente e siman aki e comision di klapchi lo tene un reuni cu tur e bendedonan di klapchi. Tin un par di nan cu a wak cu ta existi peliger, cu a haya cu ta insigur, y pa e motibo aki a pidi pa wanta e permisonan aki te ora cu yega na un areglo cu esun cu a haci e solicitud te ora e haya un otro tereno a ubica su container.

Desde 2011 tin un maneho y e reglanan ta keda na vigor, segun Sr. Dirksz. Prome ta traha cu reglanan cu tin cu cumpli cu nan. KPA ta esun cu ta duna permiso. Si mira algo ta pasa, di biaha ta avisa polis, cu ta forma parti di e comision. E permiso ta wordo temporalmente hala aden, pero esaki tambe ta depende na ki grado e situacion ta. Si e bendedo drecha e situacion bek, e ora e ta haya su permiso bek.

Tin 7 container ainda
Tin interes pa bende klapchi pero na mes momento ainda tin hopi klapchi. Tin un total di 7 container yena cu klapchi. E biaha aki tin 18 container cu ta na caminda pa Aruba. Cu e cantidad di klapchi cu e importadornan ta pidi y loke ta wordo bendi, kico ta cumbini nan. No ta bale la pena pa bisa cu ta bin cu dos container y no ta bende ni un. Pa 2 aña por warda e container di klapchi, pero di 2 aña e no por wordo bendi mas. Nan, como importador, mester yega na otro pa e cantidad keda limita. Den futuro esey tambe lo bay wordo treci dilanti. Pa e comision di klapchi, no mester resta klapchi mes.

Reglanan
Un pregunta cu ta bin dilanti ta si e reglanan cu tur aña e rebendedonan mester tene cuenta cun’e ta bayendo bon of si ainda falta mas regla y cambio di maneho di benta pa haci. Segun Sr. Dirksz, esaki ta costa y ta debi na e maneho. Por haci cambio despues pa buena marcha di siguridad y consenso di tur hende. Probablemente lo bay tin cambio pa futuro, pero esaki ta depende con tur cos ta bay.

Sr. Dirksz ta satisfecho cu tur cos ta canando basta bon na e momentonan aki, pero tin biaha ta haya cosnan cu no ta bay riba liña y p’esey nan t’ey pa trece esakinan den claridad y percura pa e siguridad di Aruba henter. No ta kere cu mester cuminsa bende klapchinan mas tempran. “Tin añanan largo cu a bisa cu e klapchi ta wordo saca dia 27 di december, pero e dia aki por bisa cu ni 3% ta habri pa bende, pasobra nan ta ocupa ta hayando nan mercancia y ta preparando nan luga. Dia 28 padilanti ya por wak e movecionnan ta aumenta y dia 30 y 31 ta e dianan di mas druk cu tin,” e ta indica.

Posibel solucion
Un posibel solucion pa e klapchinan cu a resta ta wordo discuti. E comision ta pensando riba esaki. Den futuro lo haya sa di e cambionan cu por ta na caminda. Durante reunionnan hopi cos ta wordo bisa, pero hopi biaha no ta keda cumpli pa e hendenan cu tin e permiso. A puntra Sr. Dirksz kico ta bay haci pa cu e tema aki pa futuro. “Tin biaha ta haya hopi problema cu comunicacion. Un ehempel ta cu un importado ta pidi cinco luga pa bende.

Tin biaha nan no ta comunica loke wordo bisa den reunion,” Sr. Dirksz ta bisa. Ora cu ta yama reunionnan tin hende no ta presenta, semper ta haya hendenan cu ta haci cu nan no sa of ta purba di un manera of otro di bypass e reglanan. Tin negoshi ta saca e aparato di paga candela for di paden y hinca esaki den container, pero eigenlijkesey ta algo cu no mag haci. E comision di klapchi ta controla e aparatonan pa paga candela y sa haya aparato bashi. Esaki ta algo cu no por pasobra ora cu un candela inicia, mester tin e aparato yen pa por domina esaki pa evita cu e candela bira mas grandi.