Aña a caba di habri y sindicato STA ta haya cu e lo ta un aña hopi activo y tambe di hopi turbulencia riba e tereno laboral. Un di nan tin di haber cu e situacion cu ta reinando actualmente den departamento di Inmigracion (IASA).

Presidente di STA, Diego De Cuba a declara na Bon Dia Aruba cu nan ta ocupa cu departamento di Inmigracion, caminda tin problemanan andando e ultimo dianan aki cu aña 2020 a habri.

E ta denuncia cu un maneho dictatorial ta tumando luga na IASA di parti di e directora di e departamento aki. P’esey ayera STA a dicidi di manda un carta pa e directora di IASA mes pa pidi un reunion na corto plaso. E no ta haya prudente pa habri un aña nobo yen di turbulencia na IASA.

Problema na IASA.
“Nan tin bastante problema,” segun e sindicalista. STA ta compronde cu e directora actual di e departamento di Inmigracion ta ‘actuando di mala fe.’ Esaki nan ta hayando como feedback di parti di nan delegadonan, miembronan y empleadonan cu ta traha na IASA.

Den e caso aki e sindicalista su opinion ta cu si bo ta ocupa un puesto halto, caminda bo tin cu bay maneha un departamento asina importante, e ta kere cu bo mester sa con pa comunica cu hende. “Bo no por dicta!”, el a bisa.

E ta compronde cu tin cierto caminda cu bo mester implementa locual ta e disciplina basico, y como sindicato, nan no tin nada contra. Pero den e caso aki, STA ta kere cu directora di IASA por comunica cu e empleadonan na un manera digno y na manera di hende, y no na un manera dictatorial. P’esey STA pa medio di un carta manda pa directora di IASA a pidi un reunion pa ‘trek e linea stret.’

STA ta na altura di kico a pasa fin di aña caminda cu tabatin falta di personal na AISA su post den aeropuerto Reina Beatrix. Presidente di STA ta haya cu hopi falta y responsabilidad a wordo tira riba e empleadonan. “Mi tin cu bisa cu e no ta husto pa culpa e empleadonan,” segun de Cuba. Nan sa cu esunnan cu a bay traha a hacie cu alma y curpa, pero lamentablemente tabatin un falta di personal formal.

E ta mira cu na final di cuenta, ta e directora como e persona cu ta maneha e departamento aki ta keda responsabel. Ora cu dianan di fiesta ta acercando, e directora mester a percura pa bo cuerpo tin personal disponibel y ocupacion total den tur e posicionnan cu mester wordo ocupa.

Ademas e ta kere cu e directora di IASA mester por a pone sikiera un 20% di personal riba dje, aunke cu mester a paga overtime. “Pasobra nos tur sa cu den e dianan di fiesta ta haya hendenan cu por bira malo,” el a laga sa.

Di otro banda e tin cu bisa cu e planificacion di vacacion tambe a laga hopi di desea, caminda kisas tabatin demasiado hende cu vakantie. “E cos aki no mag di ripiti den futuro,” presidente di STA a laga sa.

Pa atende tur e asuntonan aki, STA ta solicitando un reunion cu caracter di urgencia cu e directora di IASA. E no sa si tin actualmente un management team rond dje pa hiba un maneho den e departamento aki, pasobra ultimo tempo tabatin hopi bruhacion eyden.