Aña 2030 t’ey mes… Y kico a haci te awor…?

Aña 2025, falta cinco mas pa yega na 2030. Y kico ta asina importante di 2030? Bon pregunta, principalmente pa hopi hende cu no ta directamente envolvi den politica internacional y e debate continuo global tocante medio ambiente, cambio di clima, si of no, y kico lo mester haci, si of no, pa logra yega na, of mantene, un mundo unda ser humano y otro criatura por biba, ainda.

En corto, 2030 ta e aña di evalua y midi kico nos como pais lo a logra den mehora nos condicion di bida di tal manera cu tur esaki ta contribui na un sociedad cu den su aspectonan importante ta sostenible. Den e iniciativa di Nacionnan Uni aki a pidi tur pais na mundo pa haci e esfuerzo aki; no cu tur ta bay cumpli o ta cumpliendo, pero esey ta otro discusion. Esaki inmediatamente ta trece e discusion riba e pregunta kico ta ‘sostenible’ exactamente, pero nos no ta bay hinca hopi splicacion den esey, pero aki en todo caso e pensamento basico: loke nos ta haci den nos sociedad y economia, mester ta sostenible den e sentido cu e accionnan tuma no ta dañino di tal forma cu nan ta menaza di haci e mero actividad, of otro cu ta clave pa e sistema, a mas largo plazo imposible, ‘insostenible’ anto. Ehemplo? Nos industria di mineria di fosfat, cu no a dura tanto pasobra na e ritmo cu tabata extrae esaki, e recurso natural aki a simplemente caba; ayo fosfat, ayo ganashi, empleo, etcetera. Industria petrolero na nos isla? A lo largo esaki no a resulta sostenible, pero en todo caso, a base di un recurso natural cu no tabata di nos pais mes, como 90 aña di actividad economico no tabata mal intento. Nos por tin diferencia di opinion encuanto esaki, pero nos tabatin cierto beneficio durante varios generacion riba nos isla. Awor, nos sa cu tin cierto di nos, cu nan razon, lo mustra riba e consecuencianan ambiental dañino cu e actividad petrolero a laga atras, cu nos mester bay resolve ainda, mientras cu e gobierno saliente den su eterno sabiduria a percura pa e fondonan pa e limpieza di e tereno desaparece. No cu esey lo tabata suficiente, pero na inicio di aña 2025 ainda nos ta para cu e inmenso tarea ey nos dilanti.

Nos por conclui anto cu sostenibilidad economico no ta mara na cierto actividad economico specifico, pero ta trata di e posibilidad, si of no, di mantene un economia cu den su totalidad ta sostenible, den e sentido di ta asina flexible y resiliente cu cada vez cu ta necesario, e sistema tin e capacidad di reforma y modifica su forma di opera, integrando actividad nobo, por ehemplo, y terminando otro sin laga daño atras cu ta impedi e posible siguiente actividad cu por duna forza nobo na economia en general. Claro cu loke nos ta bisa aki ta puramente ‘textbook’ teorico y no necesariamente den practica ta resulta asina. Sin embargo, nos a compromete nos mes, como pais, pa haci e ehercicio di analiza y evalua kico den tur su aspectonan lo ta necesario pa na 2030 nos ta basta avanza cu tur cos cu ta importante y relevante pa nos tin un situacion bastante sostenible pa nos comunidad. Y awor, indudablemente e siguiente pregunta lo ta: Unda nos ta para? E pregunta lo causa solamente confusion, pasobra cualkier ciudadano cu bo puntra lo bisa bo: “Anto bo ta puntra ami? Bay puntra esun cu a bisa di ta haciendo algo.” Riba su mes esaki ta un tremendo contesta, cu directamente ta mustra riba e problema cu ta rondona henter e asunto aki: comunidad en general no tin un idea kico esnan cu a mira un tarea pa nan mes den esaki, ta haciendo… Nos ta asombra di topa e situacion aki? Nos redaccion en todo caso no, pasobra na varios momento durante varios aña nos a mustra riba e problema cardinal den e tipo di asunto aki, cu semper ta cay completamente den man di e gobierno di turno, cu mescos cu tur otro tarea, ta cera nan curpa paden cu nan ‘hendenan di confianza’ y den e secretismo di semper ta dicidi pa comunidad kico nan ta hiba na mesa den conferencia y seminario internacional, unda nan ta bay conta ‘loke nos a dicidi di bay haci’… Claro cu despues nan por bin conta cu nan a haya tremendo aplauso na e conferencia, loke hasta por ta berdad, pero realmente no ta relevante ora nos bay evalua aki kico a haci caba y kico mester haci ainda.

Kico nos kier bisa cu tur esaki? Cu e gabinete cu ta bay sinta awor, si tur cos bay normal te na 2029, lo tin e papel principal di logra loke por logra ainda encuanto e metanan di sostenibilidad pa 2030. Y si nan hacie den mesun forma cu e proceso di consulta, cu supuestamente segun Nacionnan Uni mester ta un consulta cu henter e comunidad, a ser hiba te awor, nan por bay conta na cualkier siguiente conferencia loke nan ta desea, pasobra lo no tin ningun hende pa contradeci nan, si manera semper nan ta hiba solamente ‘hende di confianza’ cu ta biaha cu nan como recompensa pa nan lealtad na e mandatarionan di turno. Nan por conta anto kico nan ta desea, hasta si esey lo no tin ningun relacion cu, ni relevancia pa realidad na nos isla. Awor ainda por duna e gobierno nobo e beneficio di duda pa haci algo al respecto…