Prome cu Gabinete AVP-FUTURO a huramenta, ex prome minister Evelyn Wever-Croes a publica e relato anual di su ministerionan, minister di Asuntonan General, Innovacion, Organisacion Gubernamental, Infrastructura y Planificacion Teritorial. Como ex minister di Infrastructura e tabata encarga cu departamento di DIP, cu den 2024 a experiencia cambio y retonan basta fuerte.
Den aña 2024 a cuminsa un investigacion organisatorio pa optimalisa e colaboracion entre DOW, DIP y DLV, bou di e proyecto Optimalisacion di Infraservicio, bou di e gabinete anterior. Ademas di esaki, tambe a cuminsa cu e reorganisacion di DIP.
Den e marco di e proyecto Optimalisacion di Infraservicio, a tuma luga un investigacion den 2024 na e tres infraservicio. Pa fin di 2024, e recomendacion a keda cla. A base di esaki, e relato anual ta indica, ta ser traha riba sistema y workflow cu ta causa di e servicionan individual
“Esaki por hiba na un colaboracion mas eficiente y optimalisacion di e servicio den e cadena di infrastructura riba un tempo cortico. E ta crea un transparencia riba un tempo cortico den e proceso y servicio, y di e manera ey ta sirbi como un medio importante pa garantisa confiansa den e cadena di infrastructura. E procesonan ta ser haci mas eficiente y e cumplimento ta yuda,” e jaarverslag 2024 ta indica.
E reorganisacion di DIP ta den un fase intensivo. Den 2024 tambe a haci un scan di cultura, un organogram di borchi a ser prepara, y e descripcionnan di funcion ta actualmente den fase di finalisacion.
E relato anual ta indica cu aña 2024 a marca un periodo di colaboracion intensivo den seno di DIP. Durante e aña a traha pa pone na altura cu e atrasonan cu tabata existi. Manera a wordo indica den e relato anual di aña 2023, DIP a enfrenta un acumulacion considerabel di investigacionnan, incluyendo strafrechtelijk, den su organisacion. Esaki a causa obstaculo den varios departamento, parcialmente pa motibo di falta di personal, pero tambe pa motibo di inseguridad tocante e ehecucion di e tareanan.
Den e relato anual aki ta indica e cambionan importante cu a tuma luga den 2024 den DIP. E prome cambio ta e revision di procesonan. Den 2024, varios proceso di maneho a ser revisa, cu meta pa optimalisa e fluho di trabou y mehora e eficiencia operacional. Di dos cambio ta e enfoke riba formacion di team y coaching. E documento ta remarca cu tempo y medionan a ser inverti den fortalecemento di e espirito di team y den duna sosten pa medio di coaching. Esaki a yuda pa construi confiansa den e teamnan y mehora e colaboracion. Y di tres cambio ta relaciona cu resistencia organisatorio. Segun e relato anual, pa motibo di e desaroyonan, e organisacion a mustra cu e tin resistencia y ta aspira na un structura mas fuerte y mas eficiente.
E documento ta subraya cu falta di personal ta keda un reto critico cu ta exigi atencion inmediato. Como parti di e solucion, un proceso amplio di reorientacion a cuminsa na september 2024. E proceso aki ta inclui:inventarisacion di capital humano cu ta consisti di un analisis profundo pa delinea e medionan actualmente disponibel, e rol y e competencianan; optimalisacion di tareanan, cual ta inclui redefinicion di responsabilidadnan y sigurando cu tur tarea ta ser realisa di manera eficiente; por ultimo planificacion strategico, cual ta consisti di un bureau di conseho externo cu a ser contrata pa prepara un plan di reorientacion detaya, hunto cu un plan pa implementa e cambio di cultura cu ta necesario.
Departamento di Centro di Entrega y Posesion di Tereno
E relato anual aki ta remarca cu e departamento combina di Centro di Entrega y Posesion di Tereno a traha duro durante e ultimo aña riba varios aspecto di nan tareanan. Ademas a pone hopi enfoke specificamente riba pone na altura cu e atrasonan den e procesonan di renobacion di e derecho di erfpacht di 60 aña, cu tabata un prioridad pa e departamento. Esaki a contribui na mehoracion di e proceso financiero relaciona cu esaki.
Departamento di Desaroyo di Tereno / Mehoracion di Domein
E departamento aki a dedica su esfuersonan durante e ultimo aña na varios proyecto importante. Segun e documento a duna hopi atencion na desaroyo y mehoracion di e tereno publico (domein), cu a haci seleccionnan strategico pa logra meta riba corto y largo plaso. E departamento a enfoca principalmente riba optimalisacion di e procesonan basico y preparacion di iniciativanan nobo. E departamento lo sigui traha riba e continuacion di desaroyo diferente proyecto, cu enfoke riba sosten y mehoracion di tanto e terenonan existente como esnan cu ainda mester ser desaroya.
Departamento di Politica pa Desaroyo Espacial
Segun e jaarverslag aki, e departamento aki a traha intensivamente durante e ultimo aña riba diferente tema importante, entre otro planschade (compensacion pa daño den planificacion), verkavelingen (division di tereno), y duna conseho strategico na otro departamentonan. Esfuersonan aki a contribui na un desaroyo y implementacion continua di e plan di desaroyo espacial. E departamento ta keda duna sosten continuo y conseho tanto na otro departamentonan como na partner externo. E resultado di e aña pasa ta forma un base importante pa e futuro realisacion di proyectonan di desaroyo espacial.
Departamento Comercial
Jaarverslag 2024 ta indica cu e ultimo aña a resulta desafiante pa e departamento comercial. Tabatin varios caso hereda di proceduranan legal cu ta sali for di proyectonan cu a ser para, peticionnan sin respuesta, y decisionnan dudoso for di pasado. Esaki a causa necesidad pa coregi cierto situacion y determina un direccion cla pa e futuro.
A pesar di e reto, cinco proyecto comercial a logra finalisa cu exito. Ademas, e documento ta agrega, tres proyecto importante a keda cla cu un impacto considerabel: e edificio bieu di DOW, e ex edificio di Ministerio Publico (OM), y e edificio bieu di Aduana. E departamento tambe a logra haal in e atrasonan den peticionnan pa permiso di precario.
Departamento di Supervision, Control y Handhaving (TCH)
E departamento aki ta enfatisa e gran esfuersonan cu a ser tuma, a pesar di un falta di controlador. TCH a traha di cerca cu varios partner, incluyendo polis di playa y security di hotelnan, cu e meta pa mehora e implementacion di e polis di playa.
Ademas, pa motibo di handhaving relaciona cu ROPv (Plan di Desaroyo Espacial cu reglamento), TCH a traha hunto cu Bureau City Inspector, polis y DOW pa garantisa cu e reglamentacion local ta ser cumpli. E responsabilidad legal pa implementa e ROPv ta den man di polis y controladornan di DIP, cu a ser specificamente asigna pa e tareanan.
Departamento di Maneho di Edificio
Segun e jaarverslag e departamento di Maneho di Edificio a cumpli su tarea durante e ultimo aña cu enfoke riba coordinacion di e huur di edificionan pa e diferente dependencia gubernamental. E departamento aki tin un rol crucial den haya edificionan apropia y den negocia condicionnan di huur faborabel.
Di e manera ey, e departamento di Maneho di Edificio no solamente tin un rol coordinativo, sino tambe un rol di conseho y negociacion, sigurando asina cu e dependencianan di gobierno ta operando den edificionan cu ta apropia y eficiente den costo.
E relato anual 2024 di ministerionan cu tabata cay bou di ex prome minister ta conclui cu
aña 2024 tabata un aña yen di desaroyo y reto, pero tambe di aprendisahe y crecemento pa DIP.
