Nos ta yegando fin di aña y contrario na e ultimo dos aña, tabatin menos referendum den empresanan, caminda e trahadonan kier busca representacion sindical.
Mediador di Gobierno, Anselmo Pontilius a declara na Bon Dia Aruba cu aworaki tin un referendum cu ta na caminda. Sindicato FTA a pidi referendum pa e trahadonan di Alhambra Casino. Diabierna ultimo nan a reuni cu gerencia di e casino y nan a palabra cu den principio, e referendum lo tuma luga dia 20 di november awor. Esaki e ultimo peticion pa referendum cu tin riba mesa, pero Mediador Pontilius no ta descarta cu den transcurso di dianan y prome cu fin di aña lo por drenta mas.
Encuanto cual lo ta e causa cu e aña aki ta mustra cu lo tin menos referendum cu e dos añanan anterior, e ta algo relativo. Haciendo un inventario di e cantidad di referendum den e ultimo añanan, na 2018 tabatin un total di 14 peticion pa referendum. Na 2017 tabatin 15 peticion, pero na 2016 tabatin 7 referendum. Actualmente den e transcurso di 2019, e cantidad di referendum ta menos cu 10.
“E tin di haci cu periodo cu e trahadonan ta dicidi cu nan ta organisa nan mes,” el a bisa.
Pontilius a bisa cu ta dificil pa bo por tin un bista total delanta kico ta bay pasa, cu un aña tin mas y otro aña tin menos.
