Aña 2019 no bon, 2020 kizas miho… Y despues…?

Banco Central a caba di publica su ‘Economic Outlook’ cu ta duna e resultado economico pa 2019 y loke por spera pa 2020. Manera nos tabata sa di antemano, e aña aki tabata uno di resultado mixto. Di un banda un sector turistico cu a keda desaroya bastante fuerte, pero cu no por a compensa completamente pa loke a stagna den e consumo local. Esey tabata di anticipa, pasobra nos a sinti e efecto di e medidanan fiscal cu gobierno a tuma. Banco Central ta constata cu e efectonan negativo di introduccion di BAVP y aumento di accijns riba alcohol a pisa mas cu e efectonan di baha impuesto riba salario y entrada.

Laga nos pone e debate politico un banda si esey tabata necesario, y limita nos mes awor aki na e efectonan economico. En todo caso, tin un crecemento leve den termino nominal, pero e GDP real ta mustra cu nos poder di compra a sufri: -0,7%. Esaki causa pa e efecto di inflacion di 3,3% riba poder di compra local. Banco Central ta mustra tambe cu e resultadonan di su encuesta entre consumidor pa e prome tres trimesternan di aña tabata negativo, loke tabata di spera despues di e medidanan fiscal tuma.

Di otro banda, ta anticipa cu pa otro aña e inflacion ta mengua, si naturalmente no bin medida fiscal adicional, y por resulta den un crecemento economico leve di 0,8% (GDP real). Banco Central ta señala esey tambe advirtiendo cu “mas reforma fiscal di gobierno na 2020 por frena consumo y causa un slow-down den e crecemento di GDP proyecta.” Esaki ta un punto importante: kico por bay pasa ainda riba tereno fiscal cu ta bay afecta e poder di compra local? Nos a haya di comprende cu practicamente no ta bay tin mas aumento di impuesto, por lo pronto, pero nos por lesa den e publicacion di Banco Central aki cu nan no ta exclui e posibilidad ey. En todo caso, den loke ta keda ainda di tempo pa parlamento tramita cualkier cambio di ley e aña aki, nos por pensa cu di awor pa Aña Nobo lo no tin sorpresa. Cu esaki anto nos ta for di e zona di peligro? No, pasobra si cos no cana bon den curso di prome parti di aña, lo mester coregi rumbo pa gobierno por mantene su meta di termina aña cu un surplus di 0,5% di GDP riba su cuenta. Si mester haci adaptacion esey casi automaticamente lo significa cu inflacion lo aumenta atrobe, cu consecuencia cu e 0,8% crecemento real por desaparece tambe, mescos Banco Central ta observa pa e aña aki.

Ta señala tambe cu pa 2019 e retraso cu tabatin den varios proyecto grandi a haci cu, hunto cu e crecemento den turismo, esey no tabata suficiente pa compensa pa e consumo local, cu manera tabata anticipa, no a crece. Esey na 2020 por mehora, pa loke ta e inversionnan, cu ta tuma lugar den sector priva. Den esaki ta considera e inversionnan grandi di e empresanan estatal tambe como inversion no gubernamental. Gobierno mes, cu un presupuesto hopi preta, no ta contribui tanto cu inversion, pero esey no ta un situacion di e ultimo añanan so. Pa hopi aña caba inversion gubernamental ta ser stroba pa e gastonan haltisimo di personal, riba cual nos a comenta suficiente ultimamente.

Pa bolbe un rato na e aspecto positivo di sector turistico; esaki tambe tin cos pa tene na cuenta. Manera un situacion economico internacional cu por bay den direccion robes, loke inmediatamente lo tin consecuencia pa nos, principalmente si esaki toca e mercado Mericano. Esey ta algo cu nos no tin influencia ariba, si e ta di bin, e ta bin. Sin embargo, tin un aspecto mas structural di sector turistico cu si ta preocupa nos. Esey ta e enorme cantidad di camber cu lo bin acerca den e proximo par di aña. Atrobe, nos no ta bay den e banda politico di e asunto, e decisionnan ta tuma caba, pero realmente nos por tin e pretension di mantene turismo na e mesun nivel, cu e mesun bon porcentahe di ocupacion pa tur, sin cu mester recuri na un guera di prijs unda hopi lo sali como perdedor? Ora nos ta mira tur e construccionnan aki, nos no mester puntra nos mes ki dia e ‘turning point’ ta yega? No mucho tempo pasa tabatin un debate bastante cayente tocante e mas di 4.000 cambernan cu mester bin acerca, sin inclui Sero Colorado, pero e debate ey a desaparece atrobe. Sin embargo, hopi di e problema cu nos tabata discuti, no a bay ‘por arte de magia’. Nan t’ey ainda y na nan debido tempo nan lo sali riba nos atrobe.

Un di e principal preocupacionnan pa proximo añanan, ta y ta keda nos mercado laboral. Mester bisa cu den e prome fase, di construccion di tanto hotel, nos ta logra cumpli, cu un bon parti di e forsa laboral ey procedente di exterior. Esey ta un proceso pasahero, pero despues nos ta bay haya e fase di e miles di cupo di trabao permanente pa cual nos no tin hende. ‘Regeren is vooruitzien’ nos conciudadanonan Hulandes ta bisa. Aruba nunca tabatin un planificacion laboral adecua, awor tampoco.