Ban spera cu nos a siña algo

Aña 2017 ta yegando na un conclusion y loke no por falta ta un bista riba loke nos tin nos tras na experiencia como pais. Un aña memorabel den hopi aspecto, por ehemplo riba tereno politico. Despues di un campaña bastante fuerte pero sin incidente grandi, a bin un cambio cu hopi a anticipa, y hopi tabatin miedo cu e no lo a sucede. Finalmente, nos tin un gobierno di coalicion, despues di cuatro periodo di gobernacion di un solo partido na mando, cu tur su bon y su malo. Bon pasobra en principio un solo partido den gobierno por, pero no necesariamente lo garantisa un gobierno fuerte, cu ta actua di biaha ora mester actua. Historia ta mustra nos cu esey no ta asina y cu na luga di actua ta perde tempo cu confrontacion inutil cu esunnan cu ta tribi cuestiona accion, o falta di esaki, di e partido na mando. Den un tempo relativamente cortico e afan pa contesta corectamente y diligentemente riba critica ta bay y e partido ta manera cera su curpa paden cu e grupo di fielnan rond di e ministronan.

Te awor e gobierno nobo ta haciendo un esfuerso pa splica ampliamente, haciendo nan mes vulnerabel pa critica, pasobra den splicacion ta bin eror, o ta cuminsa mira discrepancia entre partnernan den coalicion, di cual oposicion por probecha. Esey ta algo malo? Nos no ta mir’e asina. Sigur den un democracia ta importante pa acepta critica como algo natural y atende esaki como tal tambe. Keda splica y mantene transparencia den loke gobierno ta haci ta algo sumamente importante. Pero splica no tin sentido si simplemente ta keda ripiti e propio punto di bista, sin atende e critica treci dilanti. Di esey nos a mira suficiente tambe durante e ultimo ocho añanan, un hustificacion interminabel di e show, sin atende e problemanan cu tabata montona nan dilanti.

Esaki finalmente a conduci na dos incidente clave, cu a trece na luz di dia dos aspecto menos bunita di nos sociedad: e cuido social pa famia cu riesgo, y e cuido pa esunnan cu problema social psikiatrico. E cuatro mortonan cu a cay den e sucesonan aki, a trece na claridad e fayonan cu tin grandemente den e red di sosten social cu no a haya debido atencion ni debido recurso. Awor den tempo di guera pa loke ta nos situacion financiero, lo mester bay haci reparacion grandi.

Un otro incidente a pone mas na claridad ainda cu tin cos hopi robes den nos gobernacion. Pa prome biaha autoridadnan hudicial ta tene invasion na 13 luga, entre nan oficina y vivienda di e mandatario encarga cu labor. E lunanan despues a trece bastante detaye afo cu ta indica cu ta trata aki di un red di delincuencia bastante amplio, cu envolvimento di hopi hende, di abao te na halto. E aña venidero lo haya e presentacion den corte, pa establece culpabilidad di esunnan involucra. Loke a haci falta tabata un analisis mas den detaye di kico tabata e cosnan cu no tabata cana bon den e departamentonan cu ta parti di e proceso di permiso. Ni di parti di partido politico, ni di parti di prensa, cu excepcion di e medio di comunicacion aki, nos no a mira tal analisis bin dilanti. E unico cu a atende e asunto parcialmente ta e ministro nobo encarga cu labor, cu a anuncia oficialmente cu a para e ontheffing nan, es decir e excepcionnan cu e ministro encarga ta duna riba un peticion pa permiso di estadia, cu si of no a haya un conseho negativo caba di e departamento cu mester produci e conseho encuanto mercado laboral. Ta di spera cu pronto ta bin claridad con e procesonan nobo ta bay cana, pasobra e mercado no por warda y semper tin un cantidad considerabel di funcion pa cual no tin hende disponibel.

E otro sorpresa, pero no un asina grandi, tabata loke e gobierno nobo a bin haya como realidad financiero di e pais. Pa esunnan cu ta sigui esaki di cerca no tabata un sorpresa, incluyendo instancianan manera Raad van Advies y CAft. E fracaso di e rehabilitacion di e refineria, cu mester a tuma luga hunto cu e regimen mas delincuente di historia di America Latino, cu mester a sirbi como cortina di huma pa eleccion na september, no a funciona y esey ta un di e bandanan positivo di henter e asunto. Punto si ta cu nos no por conta anto cu e beneficionan economico cu tur esaki lo a trece cu ne. Manera nan ta bisa nan Ingles: We are back to square one.

Pero e reparacion mas grandi no ta esun economico. Esun grandi ta e reparacion, y sanacion cu mester tuma luga riba tereno moral y etico. Aña 2017 den su totalidad a trece afo cu nos comunidad den su totalidad, y specificamente gobernacion, mester cura di corupcion, falta di etica y moralidad cu ta venena nos manera di anda cu otro. Nunca antes nos a haya un spiel di e tamaño aki nos dilanti. No laga nos bisa cu nos no por mira y saca conclusion.