Aña 2016 practicamente a yega su fin y nos mester dedica tempo na analisa kico a sucede den e aña y kico ta spera nos den 2017. En general por bisa cu 2016 tabatin sorpresa y suceso grandi, tanto riba tereno politico como economico. Aña 2016 a habri cu candela, despues cu un reunion di gabinete a caba den pleito grandi cu a hiba e awe ex ministro di turismo na oficina di Gobernador, pa anuncia su salida condiciona for di gobierno. Mas leu den aña a yega e momento di despedida a yega, sin embargo, loke mientras tanto a culmina den e creacion di un partido nobo.

Mas remarcabel ainda naturalmente tabata a union di forsa cu partido PDR, obviamente cu e meta pa den eleccion na september proximo no keda como partido chikito den margen, sino pa acapara un proporcion suficiente di e electorado, pa por yega na un posicion clave entre e dos partidonan grandi. Esaki cu e pensamento cu si cos bay bon – pa e partido nobo – ningun di e grandinan lo saca un mayoria absoluto y lo mester negocia cu e partido aki den cualkier scenario. Esey nos lo mira na september, pero en todo caso a bin un cambio den e panorama politico cu cual e dos partidonan grandi lo mester tene debido cuenta. Ademas tin mas partido cu ta presenta nan mes como alternativa, manera e partido MAS cu a caba di haci su debut dilanti di prensa y publico. Ta importante pa specialmente e partidonan chikito (y nobo) realisa cu e fabor mas grandi cu nan por haci nan mes ta di no presenta como partido di ‘issues’ pasobra na nos opinion esey no ta yuda.

E molinanan di biento na Urirama ta importante, pero e no ta suficiente mirando e cantidad di tema crucial cu ta pidi pa solucion urgente. Relaciona cu e asunto di Urirama si por bisa cu e tema ta trece nos riba e tema mas amplio di uzo racional y adecua di e espacio limita cu nos tin. Urirama y e problemanan cu actuacion ilegal di gobierno den maneho di tereno destina na area berde segun ley di ordenamento teritorial a trece nos riba e debate mas amplio aki. Hasta Gobernador den su ultimo mensahe di Pasco ta haci referencia na esaki: nos ta duna prioridad na crecemento economico sin mas, o ta bira tempo pa rescata loke ta keda ainda di naturalesa? Y ora nos ta pensa pakico esey ta importante, corda cu no ta solamente e afan di e ‘ambientalista’ ta di considera, aunke esey ta algo pa sinceramente tene cuenta cu ne. E motibo talbes mas importante ainda ta cu nos no por permiti cu, na nomber y den interes di economia, nos ta sacrifica y daña hustamente e circunstancianan ambiental cu e mesun economia mester pa por prospera aki 10, 20, 30 y mas aña. Den e palabranan bunita pero asina hopi biaha abusa pa esnan cu otro intencion: con ta garantisa desaroyo sostenibel, cu ta duna nos yiu y nietonan tambe di come?

Pakico ta asina cu net esnan cu ta grita mas duro cu ‘desaroyo sostenibel’ ta asina importante, ta esnan cu mas ta bin cu tur tipo di desaroyo cu ta menasa exactamente e desaroyo sostenibel ey? Pakico den tur e kibramento di cabes kico mester haci y con pa duna futuro di Aruba un cara nobo, e unico cos cu nan por pensa ta habri un refineria obsoleto di nobo y sigui  traha mas hotel?

Pakico nos no ta stop di gaña nos mes y ta cuminsa admiti cu ningun di nos tin un ‘varita mágica’ pa inventa e siguiente pilar economico cu ta libra nos di nos dependencia di turismo, y di e mal idea di bolbe na un industria asina contamina manera petroleo. Ban cuminsa cu acepta cu pa e proximo 100 aña Aruba ta biba mayoria di turismo. Nos no por garantisa cu e sector ta mantene su mes na e nivel cu el a yega te awor, pero en todo caso nos no por habri man lag’e cay tampoco. Y pa salvaguardia e sector ta importante pa cuminsa actua den interes general y no di partido y mucho menos di interes personal di e politico di turno. Stop di promove simplemente e proyectonan cu cual e mandatario di turno tin compromiso (financiero), sin tuma na cuenta si esey ta loke Aruba mester.

Ta crucial den tur esaki pa nos reenfoca riba loke ta berdaderamente importante y laga un banda loke no ta. Ehemplo: si nos ta papia di turismo sostenibel, nos no ta papia unda y cuanto hotel nos kier laga bin Aruba. Nos tin mas cu basta caba! Ban preocupa nos mes pa drecha nos cas, pa nos mes y pa nos bishitantenan. Nos mester haci den grandi loke den e dianan di fiesta aki mayoria di nos a haci na nos cas: “ruim op de boel!” Resolve e problema di dump y di otro 50 dump ilegal cu ta daña nos paisahe, pa nos no hoga den sushedad hunto cu e bishita.