Gobierno local na Amsterdam a prohibi tournan cu guia pa hiba gruponan a traves di e famoso bentananan di e Red Light District di e ciudad, unda bishitantenan ta mira prostituta semi- sunu.
E movida anuncia siman pasa ta e intento mas recien di gobierno di e ciudad pa aborda exceso di turismo y protege trahadonan den Red Light District di e capital Hulandes, cu ta un magneet pa turistanan cu ta comporta malo.
Miembronan di e gruponan di tour regularmente ta abusa trahadonan di e districto y saca nan potret sin permiso, e ciudad a bisa. “Ta falta di respet pa trata e trahadonan aki como un atraccion turistico”, alcalde interino di Amsterdam, Victor Everhardt a bisa den un declaracion.
Ainda lo permiti tour di Red Light District si e guianan tene nan mes na e restriccion nobo, cu ta drenta na vigor na april, y tene e bentananan fuera di nan itinerario.
Alrededor di 115 tour guia ta pasa a traves di e districto tur dia. E ciudad a bisa cu investigacion a demostra cu e cantidad halto di bishitante ta un inconveniencia pa mas di mita di e residente y negoshinan den e area.
Prohibicion di gruponan di tour for di e bentananan den Red Light District ‘lo yuda preveni interupcion pa residente y negoshinan’, Everhardt a bisa.
Amsterdam pa varios aña a sufri di e banda negativo di demasiado hende yenando e cayanan di e curason historico di e ciudad, incluyendo e Red Light District.
