Mientras na Venezuela henter e pais ta parce sumergi den e confrontacion entre regimen y oposicion, encuanto e resultado berdadero di eleccion presidencial di diadomingo ultimo, ta parce un realidad tambe cu por lo pronto no ta yega un fin na e situacion confuso na e pais. Y como tal no ta bin un cambio tampoco cerca nos, en todo caso no den sentido positivo. Miemtras nos tin caba un situacion deprimente cu e miles di migrante actualmente na nos isla, lo mester prepara pa un situacion cu lo por empeora dentro di poco tempo. Y ningun di nos mester ta un genio pa yega na e conclusion cu e maneho te awor, si acaso por dun’e e nomber ey, a keda pa gran parti scondi pa publico y sigur no a duna un vista riba ki rumbo nos ta tuma como pais, y por lo tanto no ta loke nos mester pa por controla e situacion grave manera e por bira.

Pa cuminza talvez ta bon pa remarca cu nos no ta para nos so cu e problema aki. Cu cerca di seis miyon persona di nacionalidad Venezolano plama riba gran parti di nos continente y den resto di mundo, e duracion di e problema Venezolano ta haci cu di tur manera refugiado, o migrante si nan no tin e status oficial di refugiado, ta ‘cria raiz’ na e pais unda nan a radica. Den pais aheno, individuo ta enamora, casa of no casa pero ta haya yiu cu compatriota o cu hende local, y dado momento un eventual regreso pa nan pais ta bira un opcion cada vez mas remoto. Si bo mester puntra un persona asina directamente kico nan ta pensa, hopi lo repiti e anhelo di bolbe nan pais, pero si nan ta honesto cu nan mes, nan lo mester admiti cu esey ta mas bien un soño.

Awor, esey siendo e realidad pa gran mayoria di e miles cu ta na nos pais caba, no ta contesta e pregunta clave, cu no ta loke nan ta pensa, pero kico nos ta pensa, con pa maneha e situacion aki, tanto awe como pa futuro. Logicamente cu pa e respuesta mayoria lo wak den direccion di gobierno, cu ta parce di lo ta contento si ningun hende puntra nan ki idea nan tin. Sin embargo, sigur cu mas migrante ainda dentro di nos teritorio, ta bira urgente desaroya un maneho cu ta ‘make sense’ si acaso no a pensa nada ainda. Y no solamente un maneho defini di manera scondi pa despues hinca e documento ey den un lachi, ‘tot nader order’. Comunidad mester exigi claridad den e asunto aki, pasobra e proceso aki lo tin efecto demografico grandi riba nos poblacion.

Ademas, si no ta exigi un maneho completo y transparente, nos ta core e riesgo cu ta laga na autoridad di admision pa dicidi ken por keda, solamente basa riba aspecto di mercado laboral. Tin hopi mas pa considera, por ehemplo: cuanto simpatizante di e regimen mas repudiable di Latinoamerica ta cana rond na nos pais? Nos mester confia ciegamente cu nos servicio di inteligencia ta haci nan trabao eficazmente? Tabatin caso den e añanan nos tras di deportacion di hende cu segun nos normanan no tin nada ta haci aki? Y muestra di apoyo na e regimen di Maduro pa nos ya mester ta un motibo serio pa considera deportacion. Nos no tin pakico sinta warda te dia nos keda confronta cu hende cu awe ta stranhero pero mañan ta cuminza papia di ‘nan islanan’… Claro cu nos ta comprende cu gobierno no por y no ta bay divulga publicamente kico ta haciendo of no, pesey e ta trabao confidencial, basta cu dia bin problema no resulta cu nunca a haci algo al respecto.

Tur esaki ta hiba nos sin duda algun na un discusion di un amnistia, general o limita, pa e miles di migrante Venezolano cu nos tin aki. Nos ta na altura cu hopi hende lo reacciona bisando cu nan no kier un amnistia, pasobra esey ta percura pa haci Aruba mas atractivo ainda, cu ta haci mas hende yega. Pero pa bisa bon cla con nos ta mira esaki: no por laga e asunto aki den man di e mandatario encarga cu admision y labor, sin cu tin un maneho formal cu a pasa parlamento. Si no haci esaki, e riesgo ta grandi cu e asunto ta bay termina den un tremendo proyecto personal, cu e claro meta pa crea un ‘clientela politico’ cu vista pa futuro electoral di e mandatario. Y no bisa nos cu esey no por sucede, e tabata e caso den pasado caba, cu varios nacionalidad den nos region cu tabata haya porta habri y hasta ‘spreekuur’ special riba diasabra na Bestuurskantoor. Pues un amnistia ‘de facto’, sin ningun control.

Finalmente, manera nos a yega di trece dilanti na mas ocasion, esaki ta un asunto pa gobierno Hulandes. Nos no tin un vista di con gobierno nobo ta mira esaki, pero en todo caso lo ta inaceptable pa mira esaki como un ‘problema local’ pa nos gobernantenan resolve, ademas di e recursonan cu falta pa realiza esaki. No ta na Aruba ta dicidi ken ta haya paspoort Hulandes a lo largo, banda di e consideracion cu parcialmente esaki ta e hendenan cu por radica finalmente na Hulanda mes; nan ta desea esey?

Nos biento Caribense ta fuerte y refrescante; pero e no por hiba e problemanan aki cune. Aki ta nos mes mester actua, o exigi accion di esnan responsable; 15.000, ‘and counting’…