Amnistia Internacional ta un movemento global di mas di 10 miyon persona cu ta tuma inhusticia manera algo personal. Nan ta traha pa tur persona por disfruta di nan derechonan humano.

Cada biaha cu ta comete un abuso na mundo, Amnistia ta investiga e hechonan y ta aclaria kico di berdad a pasa.

Caso di Corsou

Na october di aña 2021, Amnistia a publica un rapport di violacion di derechonan di personanan di nacionalidad Venezolano cu ta busca proteccion internacional na Corsou. Nan a señala cu autoridadnan di Corsou y Hulanda a viola e derechonan di e personanan aki den nan rapport denomina: “Still no Safety: Venezuelans denied protection in Corsou”, den cual nan a documenta 22 caso di personanan Venezolano, entre nan muchanan menor di edad, cu a sufri violacion di derechonan humano, detencion den condicion inhumano, maltrato, separacion familiar y negacion di nan derecho di solicitud di asilo.

Un di e victimanan di nomber Miguel a haya dos tiro di bala di rubber. El a conta con funcionarionan di SDKK (Sentro di Detenshon i Korekshon Korsou) tabata castiga e y su grupo cu a solicita proteccion, nan tabata deprivanan di soño, “nan tabata causa nos daño psicologico pa nos bandona e isla”, el a bisa.

Den otro caso, tambe a yega di cera dos mucha menor di edad cu e momento ey tabatin 15 y 16 aña.

Caso Aruba

Awor ta Aruba su turno pa duna cuenta na Amnistia Internacional. Segun informacion ricibi, e organisacion aki ta bin investigando tres caso specifico. E prome ta un incidente cu a tuma luga na luna di september den instalacionnan di Guarda Nos Costa (GNC) caminda dos detenido a wordo sospecha di cende cu candela e instalacion. Pa motibo di e incidente ey, a pone e dos persona aki den isolacion sin cu nan por a laba nan djente tur mainta y a laga nan sin baña pa por lo menos un periodo di un siman.

A pone Prome minister, Evelyn Wever-Croes y minister di Husticia, Rocco Tjon na altura di esaki dia 15 di september ultimo mediante un e-mail cu redactor di Bon Dia Aruba a manda pa nan sin cu por a haya contesta riba e suceso.

E di dos caso ta di e hoben Venezolano, Maykol Chavez unda cu na final di tur e problema cu el a enfrenta, dia 15 di september 2022 minister di Labor y Integracion, Glenbert Croes representa pa J. Harewood na Corte di Husticia, honorario hues mr. A.J. Martijn a dicta den un sentencia cu DIMAS a viola articulo 25, vierde lid, van het Procesreglement 2022 di corte y cu e persona en cuestion no a haya un proceso husto manera cu ta hancra den nos constitucion di Aruba y tratado internacional di cual Aruba y Hulanda ta forma parti, cu ta articulo 6 di EVRM, esta e derecho na un huicio husto cu ta fundamental pa democracia.

E parti tambe cu ta den investigacion ta despues cu e hoben Maycol Chavez a sali for di Corte di Aruba dia 31 di augustus unda e tabata presenta pa un di casonan. Te dia di awe minister Rocco Tjon, ex-director di GNC R. Kramers ni e director interino I. Gordon no por of no kier contesta e preguntanan mas fundamental, cu ta: dicon Chavez a wordo intercepta pa dos funcionario di GNC E. Perez y G. Solognier manera e la sali for di corte y e rapport di inbewaring stelling no ta completo y no ta klop cu e videobeeld? Den e rapport ta falta hechonan importante, manera dicon e toezichter G. Solognier a laga e parti afo for di rapport cu GNC a kibra ley di trafico ora nan a pasa den verboden? Si nan tabata trip den verboden of si nan a haya opdracht for di Kramers pa opspoor e persona aki? Nan a detene un hende memey di Caya Grandi na momento cu e caya tabata cera y nan a kibra ley di trafico poniendo bida di turistanan abordo di tram na peliger. Unda nan tabata warda Chavez 10 minuut prome cu su detencion? Y si un funcionario di DIMAS a tip nan off for di Corte pa detene Chavez den Caya Grandi?

Di e caso aki, tin hopi pregunta cu minister Rocco Tjon no kier contesta. Un di nan ta cu e rapport di inbewaring stelling cu ta mita berdad y cu ta falta di elementonan mas importante, manera si GNC ta controla den verboden? Si funcionarionan ta haci control bisti na civil den auto di Medish Dients di GNC? Y si nan a haya autorisacion di e ex-director Kramers of di minister Tjon pa core den verboden pa por detene un persona kibrando ley di trafico? Sin pone tur esaki den e rapport oficial cu a wordo traha e dia ey.

 

A base di e mita di e berdad di e rapport aki, un hues comisario a dicidi di priva di libertad un persona. Ta preguntanan importante cu minister Tjon no kier contesta si a viola derechonan di un proceso husto manera EVRM den su articulo 6 (E derecho na huicio husto) ta indica.

Segun nos “estado di derecho na Aruba”, e poder hudicial ta protege derechonan y libertad, ta defende estado constitucional democratico, ta defende e aplicacion corecto di ley y ta sigura decisionnan di huesnan independiente, imparcial, honesto y experto, basando su decisionnan riba informacion corecto di instancianan gubernamental.