(AFP) – Amnistia Internacional (AI) ayera diamars a denuncia cu e detencionnan pa motibonan politico ta continua na Venezuela como un “atake sistematico” contra e poblacion y a pidi libertad pa casi 300 persona considera como presonan politico.

“Detencionnan arbitrario pa motibonan politico na Venezuela ta sigui forma parti di un atake sistematico y general contra di e poblacion di e pais aki, esey principalmente cu e obhetivo di silencia esnan cu ta pensa diferente na gobierno di Nicolas Maduro of cu otro fin politico,” e NGO a sigura den un rapport nobo tocante detencionnan cu a tuma luga entre 2018 y 2023.

“E diversidad den e perfil di e personanan deteni arbitrariamente na Venezuela ta duna cuenta cu e persecucion no solamente ta contra esnan cu ta opina diferente, sino cu tambe ta busca manda un mensahe di intimidacion na famianan of personanan cerca na esnan cu nan ta busca intimida,” e organisacion a sostene den su rapport “Vidas detenidas.”

Nan a sigura cu “e criminalisacion di e personanan a ser consolida” a traves di tribunalnan cu cargonan di terorismo y a adverti cu esaki ta pone pio e consecuencianan di e procesamento penal.

E organisacion tambe a identifica “patronchinan” den e detencionnan cu ta sucede sin orden hudicial, falta di independencia hudicial, ta aplica leynan di forma anticua y ta utilisa “incomunicacion” y aislamento di e personanan deteni, entre otro.

“Derecho na libertad, huicio husto, integridad y pa no ser someti na tortura of mal trato ta un violacion debi na e practicanan aki,” a afirma.

Erika Guevara Rosas director pa America di AI a bisa cu “den e rapport solamente no ta documenta e detencionnan inhusto di maestronan, sindicalistanan y defensornan di derecho humano na pais, sino tambe e arbitrariedad di e sistema di husticia, condicion di reclusion inhumano y afectacion na proyectonan di bida cu ta impune. Detencionnan arbitrario no por continua como un herment di represion y control social di gobierno.”

Segun AI, na Venezuela tin cerca di 300 persona preso debi na motibonan politico, entre cual nan a identifica nuebe caso considera “emblematico,” manera esun di Javier Tarazona director di NGO FundaRedes cu ta atende habitantenan na e zona fronterizo.

Tarazona a keda deteni na juli di 2021 y a ser imputa cu e cargo di terorismo despues di cu a acusa gobierno di Maduro di tin vinculo cu guerrilla Colombiano di ELN.

Emirlendris Benitez di 42 aña ta un mama comerciante, deteni arbitrariamente for di 5 di augustus di 2018, el a ser vincula cu actonan di violencia cometi contra Nicolas Maduro, maske ta na estado el a ser tortura y someti na un interupcion forsa di su embaraso, e consecuencianan di e golpinan cu a sufri a lag’e cu uso di un rolstoel, Emirlendris ta cumpli un condena di 30 aña di prison na Instituto Nacional di Orientacion Femenino (INOF) na Los Teques.

AI a pidi na Estado e libertad pa tur hende deteni y a solicita na comunidad internacional pa pidi garantianan pa Venezuela y evita e ripiticion di e detencionnan aki.

Tambe a pidi na Corte Penal Internacional pa inclui tur e casonan di investigacion cu ta realisa pa crimen di lesa humanidad cometi durante e gobierno di Maduro.