Ayera 1 di october, e NGO Amnesty International a publica un rapport tocante e situacion di refugiado Venezolano na Aruba.

Refugiadonan Venezolano na Aruba ta victima di falta di legislacion specifico di asilo riba e isla, segun e rapport di Amnesty International (AI). E crisis post-electoral na Venezuela ta mustra e urgencia y necesidad pa leynan di asilo pa tanto protege Venezolanonan huyendo di e crisis di derechonan humano na nan pais y facilita y sigura nan derechonan humano na Aruba na nan yegada.

Aruba ta apenas 24km leu for di Venezuela y hopi Venezolano yegando Aruba iregularmente den biahenan peligroso riba lama, automaticamente ta ser poni den facilidadnan di detencion na nan yegada y deporta.

Esaki ta un di e conclusionnan di e rapport investigativo mas recien di Amnesty International titula “Regla pero no proteccion: desvelando gap den proteccion di refugiado pa Venezolano na Aruba’, publica ayera.

E rapport ta resalta e falta di legislacion specifico relaciona cu refugiado na Aruba, problemanan asocia cu detencion di solicitante di asilo y refugiado, y preocupacion tocante e trato di solicitante di asilo Venezolano, incluyendo mucho.

E rapport ta representa e prome investigacion di Amnesty International riba solicitantenan di asilo Venezolano na Aruba.

Aplica pa asilo na Aruba

Aruba, parti di Reino Hulandes, y cu un poblacion di 107,151 persona, ta un destinacion popular pa Venezolanonan buscando proteccion desde e brote di e crisis na e pais. Te cu juni 2023, AI ta calcula cu tin 17mil Venezolano na Aruba.

E rapport ta destaca cu no tin trafico aereo directo entre Venezuela y Aruba desde 2018, y Venezolanonan mester cumpli cu rekisitonan specifico y visa y tin documentonan rekeri pa por drenta Aruba. E documentonan ta actualmente dificil pa hopi Venezolano obtene, y hopi Venezolano ta yega Aruba via biahenan peligroso riba lama, segun AI.

E rapport ta destaca cu Venezolanonan por aplica pa asilo di diferente manera na Aruba:
-Na nan yegada riba isla via medionan regular (legal);

-Mientras cu ta na Aruba;

-Of despues di keda poni den un facilidad di detencion di migrante.

“Mientras cu Amnesty International ta compronde cu condicionnan ta dificil pa un isla manera Aruba,” segun Dagmar Oudshoorn, director di Amnesty International Hulanda, “a ratifica tratadonan internacional di derechonan humano cu ta implica cierto derecho y obligacion relaciona cu refugiado y asilo.”

 

Aruba ta parti di e Convencion di Refugiado di 1951 y mester cumpli cu su obligacionnan, manera e principio di no-devolucion, cu ta prohibi pa debolbe hende na paisnan unda nan por encontra persecucion, tortura y otro violacion di derechonan humano, manera ta e caso na Venezuela.

Participacion di gobierno Hulandes
 “Amnesty International ta opone e deportacion di Venezolano for di Aruba y ta preocupa tocante e proteccion di Venezolanonan na Aruba,” segun Dagmar Oudshoorn. “E organisacion di derechonan humano tambe tin preocupacion tocante e participacion di gobierno Hulandes den e acomodacion di refugiado na Aruba.”

Gobierno Hulandes ta duna sosten na Aruba den acomodacion di refugiadonan Venezolano. E sosten aki ta consisti di ayudo financiero y tecnico. A paga pa vuelonan usa pa deporta Venezolanonan, loke ta nifica cu Hulanda posiblemente a contraveni e principio di no-devolucion tambe.

Documentonan di ambos gobierno ta duna evidencia di esaki. Sosten di gobierno Hulandes ta enfoca principalmente riba tracing di Venezolano y nan detencion y deportacion, na lugar di nan proteccion, segun AI.

Detencion forsa di migrante

Venezolanonan cu drenta Aruba di manera iregular ta keda aresta y poni den detencion di migrante. Na nan yegada nan ta ricibi un orden di detencion y ta confisca tur posesion personal, manera celular. Dentro di 72 ora un hues ta evalua e legalidad di e detencion. Mientras cu ta existi e posibilidad pa hende deteni na e centronan di detencion aplica pa asilo, esaki no ta conocemento comun.

Algun Venezolano cu tabata deteni na facilidadnan di detencion di migrante a indica cu a presiona nan pa firma orden di deportacion. E hecho cu e documentonan aki ta den Hulandes ta nifica cu hopi Venezolano no ta compronde kico nan ta firmando. Ademas, condicionnan na e centronan di detencion ta pober. Abogadonan no tin acceso ilimita na hende den e centronan, y muhenan na estado y hende cu problema di salud ta cera y deporta. Algun Venezolano a indica cu a trata nan di manera humiliante y xenofobico.

“Mi a drumi riba suelo den un container pa dianan. Sin awa, luz, paña limpi, habon of skeiro’i djente. Mi no tabata permiti pa bay pafo pa aire fresco,” segun ‘Omar’, kende tabata deteni den un container.

Amnesty International cu yamado pa accion

Amnesty International ta haci un yamado pa autoridadnan na Aruba adopta legislacion specifico di asilo, cu ley specifico aplicando pa mucha. Aruba mester sigura cu Voogdijraad ta ser involucra pa tur caso involucrando mucha, y cu no ta detene ningun mucha. Ademas, solicitante di asilo, refugiado y migrante Venezolano mester tin acceso na proceduranan di asilo husto y efectivo, incluyendo informacion na Spaño tocante nan derecho. Aruba tampoco mester manda forsosamente ningun Venezolano back na Venezuela, of automaticamente detene cualkier Venezolano cu drenta Aruba di manera iregular.

Gobierno Hulandes mester sigura cu ta respeta y salvaguardia derechonan humano na henter Reino Hulandes, y e sosten financiero y tecnico no ta resulta den of contribui na abuso di derecho humano na Aruba.

Background extendi: E crisis na Venezuela

Desde 2015-2015 Venezolanonan a experimenta aumento di deprivacion, erosionando nan derechonan economico y social, specialmente pa salud y cuminda. Y al menos desde 2017, hopi Venezolano a huy como resultado di e politicanan represivo sistematico di gobierno lidera pa Nicolas Maduro contra criticonan di gobierno y miembronan di oposicion. E politicanan aki a conduci na un variedad di abuso incluyendo ehecucionnan extrahudicial, uso di forsa excesivo, detencion arbitrario y otro forma di maltrato.

E crisis na Venezuela ta caracterisa pa un emergencia humanitario profundisando, violacionnan sistematico di derechonan humano, y un empeoramento economico y politico.

Pa motibo di e estado di derecho desfuncional na Venezuela, ciudadanonan ta keda sin por obtene proteccion na nan propio pais. Ademas di violacion di derechonan humano, Venezuela ta lucha cu aumento di desigualdad y salarionan abao resultando den mayoria di e poblacion ta incapaz di paga pa productonan basico. Tin un falta general di provision di servicionan fundamental manera gas, electricidad y awa.

E crisis multidimensional a resulta den mas cu 7.71 miyon Venezolano, 25% di e poblacion di Venezuela, hayando nan mes obliga pa bandona nan pais y busca proteccion otro caminda, haciendo esaki un di e crisisnan di desplasamento na mundo. Paisnan Latino Americano y Caribense a ricibi mayoria di e refugiadonan aki (aproximadamente 6.5 miyon).

Aruba ta un destinacion popular pa Venezolanonan buscando proteccion desde e brote di e crisis na e pais. No ta djis e proximidad di Aruba, ya cu ta apenas 24km leu di Falcon na Venezuela, cu ta atractivo pa hopi Venezolano, pero tambe e decadas di lasonan social, economico y historico existiendo entre e paisnan.

Nota di redaccion: E articulo aki ta basa riba e rapport di Amnesty International. Pa lesa comentario di Bon Dia Aruba y mas contexto y analisis di e rapport y e situacion di refugiado na Aruba, lesa Editorial riba Pagina 5.