(CuraçaoChronicle) – Autoridadnan Curasoleño y Hulandes a viola e derechonan di Venezolanonan buscando proteccion internacional na Corsou, segun Amnesty International a bisa ayera den e reporte nobo, ‘Still no Safety: Venezuelans denied protection in Curaçao’.

E organisacion a documenta 22 caso di Venezolanonan, incluyendo mucha, kende ta someti na violacionnan di derechonan humano manera detencion automatico bao condicionnan inhumano, maltrato, separacion di famia, y nenga nan derecho pa solicita asilo.

Casi 5.7 miyon Venezolano a huy di e crisis di derechonan humano na nan pais, haciendo esaki un di e crisis di desplasamento forsa di mas grandi na mundo. Corsou, un isla Caribense cercano cu ta parti di Reino Hulandes, ta un di e paisnan destino. Ta calcula cu 17mil Venezolano ta biba cu status migratorio iregular riba e isla.

“Ta inaceptable cu Reino Hulandes a sostene autoridadnan Curasoleño den busca, detene y deporta hende cu a huy di Venezuela den busca di seguridad. Na luga di ignora hendenan kende nan derechonan humano ta ser viola, autoridadnan Hulandes mester sigura cu nan ta ricibi e proteccion internacional cu nan mester”, segun Erika Guevara-Rosas, director di Americas na Amnesty International.

Ainda sin proteccion

Amnesty International a haya cu e situacion di Venezolanonan buscando proteccion na Corsou no a mehora desde publicacion di e reporte ‘Deteni y Deporta’ na 2018. Maske Corsou a introduci un procedura nobo di proteccion internacional, esaki ainda no ta cumpli cu ley y standardnan internacional di derechonan humano.

Por ehempel, Venezolanonan cu ta huy di e crisis automaticamente ta deteni pa periodonan di tempo indefini, durante cual ta presiona nan pa firma formulario dunando permiso na deportacion y tin acceso hopi limita na asistencia legal. E entrevistanan di evaluacion di proteccion ta ser ehecuta pa oficialnan di gobierno kende tambe ta a cargo di aresta stranheronan cu status migratorio iregular.

Te awo, e procedura nobo a conduci solamente na rechaso di aplicacion pa status protegi. E organisacion ta profundamente preocupa cu Corsou consecuentemente ta manda hende back na Venezuela unda nan ta den riesgo di violacionnan serio di derechonan humano, den violacion di e principio internacional di non-refoulement.

E condicionnan den e kazerne di stranhero, e centro di detencion den e prison Centro di Detencion y Coreccion Corsou (SDKK), ta keda inhumano, sometiendo e detenidonan na deprivacion sensorial, aglomeracion, keda cera entre prisoneronan condena, y falta di privacidad.

Venezolanonan a bisa Amnesty International cu e guardianan di seguridad a somete nan na trato degradante y inhumano, manera abuso verbal y fisico, y siendo forsa na bula manera dori mientras ta sunu.

Na 2019, polis a tira riba un grupo di Venezolano cu tabata den e kazerne di stranhero cu bala di rubber. E forsa intencional y desproporciona cu polis a usa contra nan, y e severidad di e lesionnan, por conta como maltrato of tortura.

Miguel, kende tabata entre esnan cu ricibi tiro di bala di rubber, ta recorda con e guardianan y castig’e y su grupo pa a busca proteccion: “E ora ey e locura a cuminsa: e guardianan no a laga nos drumi. Nan a haci zonido tur momento cu martiu. Mi tabata drumi riba vloer y mal alimenta. Mi a baha trinticinco kilo den cinco luna. Nan a haci nos daño psicologico pa sigura cu nos bandona e isla.”

Detencion di mucha y separacion familiar

Corsou a viola e derechonan di mucha Venezolano door di detene y separa nan di nan mayornan cu ta biba na e isla. Amnesty International a haya ocho caso di mucha cu tabata deteni entre adultonan na e kazerne di stranhero of den institucionnan hubenil.

No a reuni nan cu nan mayornan ni a permiti e mayornan bishita nan.
Na luga di esey, autoridadnan Curasoleño a deporta nan of tabatin plan pa deporta nan sin conocemento ni autorisacion di nan mayornan. E sufrimento intencional y severo cu e oficialnan di gobierno a causa door di deporta mucha y separa nan for di nan mayornan den algun caso por ta considera como tortura.

Den caso di Yusmari, su dos yiu homber, edad 15 y 16 aña e tempo ey, automaticamente a keda deteni den kazerne di stranhero despues cu wardacosta a intercepta nan y entrega nan na polis di inmigracion. Yusmari, kende ya tabata biba cu status migratorio iregular riba e isla, ta recorda tempo cu a pone nan den e kazerne: “Cada biaha nos yama, nan tabata yora.”
Su yiu menor, kende awo ta back na Venezuela, a bisa Amnesty International: “Mi a sinti malo. Mi no tabata custuma na ta deteni.” Despues di dos dia, yiunan di Yusmari tabata deteni den un institucion hubenil unda e no tabata permiti pa tin contacto of bishita nan. Pa ora finalmente el a haya permiso y a yega e institucion hubenil, el a haya sa cu autoridadnan Curasoleño ya a deporta su yiunan.

Contribucion di Hulanda na violacionnan di derechonan humano
 A pesar di varios señal alarmante tocante violacionnan serio di derechonan di migrante y refugiado cometi den añanan recien, autoridadnan Hulandes a intensifica nan cooperacion activo y sosten na Corsou, principalmente den ramo di deteccion, detencion y deportacion di migrantenan iregular y hende buscando proteccion.

Na november 2019, ehercito Hulandes a asisti den cuido di un grupo di Venezolano deteni ilegalmente, kende ta parce di a keda colectivamente deporta, den violacion di ley internacional. Hulanda tambe a duna Wardacosta di Hulanda Caribense ekipo y personal pa intercepta hende cu ta yega riba boto di forma iregular, sin importa e riesgo halto cu nan ta core di ta someti na violacionnan di derechonan humano riba tera.

Autoridadnan Hulandes no a crea ningun salvaguardia di derechonan humano obligatorio, mecanismonan di monitoreo independiente, ni investiga violacionnan mientras ta sostene autoridadnan Curasoleño. E Secretario di Estado responsable varios biaha a declara cu autoridadnan Hulandes no tin obligacion pa haci esaki, pasobra gobierno Hulandes ta considera politica di migracion y posibel violacionnan como responsabilidad di Corsou.

Sinembargo, Amnesty International a tuma e posicion cu obligacionnan internacional pa respeta y protege derechonan humano tambe ta aplica na Hulanda na momento cu ta duna sosten na autoridadnan Curasoleño. Autoridadnan Hulandes obviamente a faya den haci esaki y pa e motibo ey a contribui na un sistema di violacion.

Amnesty International ta haci un yamado na autoridadnan Curasoleño pa garantisa e derechonan di Venezolanonan buscando proteccion door di crea un procedura di asilo cu ta cumpli cu standardnan internacional. Nan mester stop e detencion di mucha y e separacion di famianan; y usa detencion di adulto solamente como ultimo recurso. Nan mester ehecuta investigacionnan rapido, profundo, independiente y imparcial riba tur acusacion di violacionnan di derechonan humano cometi durante aresto of den custodia.

Gobierno di Hulanda mester evalua riesgonan di derechonan humano y crea salvaguardianan obligatorio aplicable na e sosten cu ta duna na autoridadnan Curasoleño. Ademas, Hulanda mester establece un investigacion independiente pa investiga su responsabilidadnan den asistencia y otro formanan di cooperacion entre Hulanda y Corsou den sector di migracion y proteccion internacional, en particular riba cuido di Venezolano den sports hall na 2019 y e accionnan di Wardacosta.