Awe mainta parlamento mester a sigui cu e siguiente ronda di e reunion publico pa trata cu e amienda di Codigo Civil caminda Ministernan tabata tin e turno awo pa contesta e preguntanan cu a bini pa dilanti siman pasa. Presidente di Parlamento Sra. Marisol Lopez Tromp ta bisa Bon Dia cu e ta kere cu hopi hende a bay riba otro topiconan cu no ta den e amienda hinca cual nan tin e libertad pa haci.
”Tin e libertad pa discuti, sin embargo e amienda no ta trata ningun aspecto directamente di casamento den misa, e no ta toca e parti sexual ni tampoco e ta toca religion. E ta un discusion cu a bay hopi leu eigenlijk.” Sra. Tromp ta bisa Bon Dia. Sra. Tromp ta agrega cu e ta pensa tambe cu hopi politico no ta cla ainda pa fiha un posicion sea pro of contra e amienda pasobra no lo tin otro motibo pa para of pospone un tratamento grandi asina cu tin tanto otro topico den dje. ”Ora cu bo kier schors tin di haber cu no kier fiha un posicion riba e amienda di Desiree pa un of otro motibo.” E ta bisa. A keda na turno pa Minister di Husticia Sr. Drs. Arthur Dowers y Minister di Departamento Asunto Social Sr. Drs. Paul Croes pa contesta tur e preguntanan cu a bin pa dilanti den e prome ronda y segun Sra. Tromp, ta depende con largo ministernan contesta of si nan contesta pa por evalua si ta bay tin mester di mas tempo pa trata e amienda aki cu tur e otro puntonan cu ta bini cun’e. ”E ta un ley hopi grandi, tin hopi otro punto mas y ta depende si bin mas amienda of si minister pidi pa mas tempo, tin biaha ministernan ta contesta pa oranan largo pues no sa realmente con esey lo bay tur ora precies.”
Un di e puntonan di e amienda aki ta pa simplemente registra e parti di bienes entre dos persona pero sinembargo e comunidad religioso ta keda contra pasobra segun representante di ‘Bo Sirbidonan’, Sra. Hiacintha Thijsen ta conta Bon Dia, pa permiti dos pareha di mesun sexo haci esaki e ta un reto directo na Dios cu ta bay tin su consecuencianan.
Comunidad religioso ta discuti rendimento di hende
Segun Sra. Thijsen ta splica Bon Dia, actualmente comunidad Catolico ta discutiendo e tema cu e cantidad di hende cu ta muri na mundo ta mas halto cu esun cu ta nace. Esaki a wordo predica diadomingo den Parokia di Savaneta cu segun Sra. Thijsen ta bisa, si e cos ki bay sigui y bira mas grandi, unda rendimento di mundo lo bay pasobra poco poco esaki ta bay bira menos si hasta awor lo tin mas parehanan di mesun sexo ta biba hunto. ”Nos tin cu bay concentra y resa. Esey ta e miedo cu ta sinta aworaki den religionnan rond di mundo cu e ta un fenomeno nobo cu ta creciendo aworaki.” Sra. Thijsen ta bisa. Ta retando Dios segun e comunidad religioso mientras cu ta Dios a pone nos riba e mundo aki. Sra. Thijsen ta conta Bon Dia cu el a yega di papia cu Sr. Maikel Kelly di ALFA poco aña atras unda a cuminsa un diferencia di opinion caba. ”Kelly a yama mi, nos a combersa nan a invita mi na nan luga, mi a pidi nan pa duna mi un motibo pasobra bo ta un yiu di Dios , bo ta semehansa di Dios pakico desvia di Dios? Rondia un Lesbian y casa cun’e esey mi a bis’e, pakico e mester ta homber cu homber? Boso no ta rende mundo. Dios su semehansa ta pa bin mundo y rende mundo.” Sra. Thijsen ta bisa.
Diferencia di opinion ta bay keda, locual ta exigi ta respet
Segun Parlamentario Sra. Desiree de Sousa Croes ta splica Bon Dia opinion no ta bay cambia di parti di tur dos banda y despues di esaki por semper keda papia cu otro pa wak con por compronde tur dos banda. ”E ta keda un diferencia hopi grandi, lastima cu nan ta keda expresa nan mes den forma denigrante e ta hopi di lamenta.” Sra. Croes ta Bisa. Matrimonio Homosexual segun un dictado di Corte Europeo pa Derecho Humano, ta bisa entre otro cu no ta un derecho humano fundamental cual ta algo cu ta para den un carta di e comision Cristian na Aruba unda nan ta bisa di nunca por ta di acuerdo pa duna igual derecho cu matrimonio original na comunidad Homosexual. Den e carta ta para tambe cu tanto Corte Europeo como Nacionnan Uni ta reconoce e derecho di Aruba pa mantene su propio norma y balornan sin cu otro pais ta impone nan normanan riba nos cual ta conta tambe pa veredictonan di hues.
Segun Sra. Croes, tin un otro nificacion unda cu Corte Superior Europeo pa Derechonan Humano ta bisa cu un relacion di hendenan di mesun sexo ta un bida di famia, anto un bida di famia ”Family Life” ta importante pa protege. ”Ta hopi importante pa compronde esey y e ta bisa si cu bo no por obliga un pais miembro di Union Europeo pa introduci matrimonio homosexual, sin embargo nan tambe ta bisa cu si bo no busca un alternativa, por ehempel ”Geregistreerd Parternschap”, bo ta violando derechonan humano.” Sra. Croes ta bisa.
Mundo ta cambiando
Hopi experto huridico ta bisa cu e siguiente nificacion nan lo bay bisa cu Matrimonio Homosexual tambe ta un derecho humano mirando e situacion di cambio hopi grandi cu ta tumando luga mundialmente riba e tema aki segun Sra. Croes. ”Mirando e situacion na Aruba mes unda cu ya tin hopi pareha den un matrimonio homosexual, mi ta kere e situacion di Aruba ta presta su mes hopi bon mes pa un ‘test case’ pa Aruba introduci matrimonio homosexual , cualkier otro abogado lo bisa bo cu e chens ta hopi grandi pero pa awo locual nos lo ta hopi satisfecho cun’e ta por lo menos pa tin un otro tipo di areglo unda nos por proteha nos relacion cu hopi mas derechonan.” Sra. Croes ta bisa Bon Dia.
E asunto aworaki ta uno di respet pa dignidad pasobra segun Sra. Croes, na dado momento bo no por bisa tampoco pa bay saca nan for di e buki cu ta trata hende y famia. Pa comunidad LGBT, kico cu lo wordo regla mester ta den e buki eynan anto eigenlijk e unico cos cu bo por regla cu ta duna tur derecho ta un registracion di pareha, of minister y gobierno mester bini cu un otro nomber cu ta carga e mesun derechonan. ”Mi no ta worry ken bini cun’e, con e bini tanten cu e derechonan t’ey y respet pa dignidad humano ta den dje. E lucha sigur no ta caba eynan pasobra tin hopi mas cos pa regla y mi ta kere esey mester tuma su tempo.” Sra. Croes ta bisa.
