E amienda destina pa garantisa derechonan di igualdad civil di entre otro parehanan di mesun sexo ta na caminda bek pa parlamento hunto cu 800 otro cambio den e ley di codigo civil (Burgerlijk Wetboek) cu mester tuma luga. Actualmente e proceso ta na Directie Wetgeving en Juridische Zaken pa adaptacion ya cu tin mas o menos 6 mil detaye cu mester adapta door di e amienda aki.
Amienda number 7 a bin como resultado di amienda number 1 y 2 presenta pa parlamentario Desiree de Sousa-Croes durante cu tabata ta trata e cambionan di ley di e codigo civil. Amiendanan number 1 y 2 a wordo retira pa e parlamentario mes y di un total di 9 amienda presenta e mesun dia, 5 di nan a keda revoca. E motibo dicon e parlamentario a bin cu e iniciativa aki, ta pa e hendenan di e mesun sexo por regla pa ley nan asuntonan, ya cu si un di nan muri, esun cu ta keda ta keda desampara y no ta haya nada di loke nan a traha hunto pa añanan largo. E parlamentario ta considera cu ta un derecho automaticamente cu despues cu nan a traha duro pa locual nan a construi den nan bida, nan por gosa di dje, sin cu nan tin cu drecha esaki dilanti notario.
Cambionan y spirito di e amienda 7
E introduccion di e amienda aki ta trece cu ne cu mester bin cu mas cambio den otro leynan cu ta existi. Segun sra. de Sousa-Croes ta splica, fei siman pasa el a compronde di gobierno cu ta mas cu 6 mil cambio e amienda aki ta trece cu ne. E cambionan aki tin detayenan den 35 pa 50 otro ley cu mester wordo cambia pa acomoda e union civil cu parlamento a vota pe aña pasa. Esaki ta e motibo pakico e ley cu ta inclui tur e cambionan aki, ainda e no a bin na vigor.
Como legislado, sra.de Sousa-Croes a carga e bandera den parlamento di e comunidad LGBTA; e ultimo letter ‘A’ ta di Aruba. E ta na defensa di derechonan civil y igualdad den nos comunidad. E ultimo informacion cu el a haya sa ta cu e ley aki ta caminda pa bay parlamento bek.
E ta kere cu e cuerpo legislativo cu esfuerso pero gosando di e confiansa di e pueblo, lo por trat’e prome cu fin di aña of eventualmente na inicio di 2018. E ta mas tanto un formalidad pasobra den tur e añanan cu nos organo legislativo ta existi riba un tipo di ley asina, no ta debati mas. Riba un tipo di ley asina bo ta simplemente bisa, ya ma vota pro e ley. E biaha aki cu e ley ta bolbe parlamento, e parlamentarionan ta bisa: mi ta vota tambe pro e ley cu ya ma acepta pa e bay na vigor. Mester remarca si cu tin parlamentarionan cu a vocifera despues di a vota pro, cu nan no lo vota contra e cambio aki.
E ta reconoce cu tin coleganan di su mesun fraccion cu e no por convence nan cu igualdad ta un derecho humano. Pero tambe otro miembronan di otro fraccion tambe tabata contra. Te hasta den cuadro di eleccion venidero un partido a wordo lanta y den nan programa di partido ta pidi sosten di e pueblo votado pa nan drenta parlamento pa bay vota contra amienda number 7.
E ta haya cu amienda number 7 ta un consecuencia di e base humano di ta igual di nacemento na tur otro. “Sigur e comunidad LGBTA lo por celebra un reconocimento di nan derecho humano”, el a bisa.
E transgenero
El a bisa cu e letter ‘T’ ta para pa e hendenan di transgenero, cu ta e persona cu simplemente ta nace loke ta wordo yama un ‘curpa robes cu ningun hende por yuda ya cu e ta nace asina. E ta comproba medicamente.’
E ta haya cu den e comunidad LGBT, e persona transgenero ta esunnan cu mas a sufri bou discriminacion, morto, abuso sexual, violencia etc.. No na nos pais pero si den otro paisnan, te hasta den paisnan den reino pero sigur den nos region Caribe y Latino Americano. “Hopi dificil nan tin e.”
Na Aruba tin un grupo transgenero cu ta ‘out’. E calculacion ta entre 0.1% pa 0.3%, kiermen alrededor di 200 hende transgenero. Nan ta hende cu tin biaha ta biba un bida infeliz y te hasta nan tin cu bay biba na un otro pais. Na Hulanda a cambia e ley, unda e grupo aki por cambia su sexo riba papel sin cu e mester pasa den un operacion.
E ta haya cu ta importante pa pueblo compronde cu e grupo aki ta hopi diverso y nan lucha ta diferente tambe. Nan ta hende cu generalmente no ta interesa pa bay casa of haci un union civil necesariamente. Mas cu tur cos nan lo kier un confirmacion di locual ta nan genero. E ta kere cu esaki ta otro tipo di acercamento cu nos mester tuma na Aruba. Esaki ta un lucha cu e kier cuminsa tambe papiando y splicando nos comunidad di unda e situacion di e transgenero ta bin.
“Mi no ta kere cu pueblo lo ta contra di loke ciertamente e mediconan ta considera un fenomeno medico.” E persona aki mester por haya e oportunidad pa biba e genero cu nan ta, el a bisa. E ta un tema dificil pa papia di dje, pero e ta kere cu mayoria di biaha e problema ta sinta den un falta di conocemento rond di e tema aki. Mas cu falta di conocemento, e ta kere cu ta falta di comprension cu un persona den su realidad no por compronde e realidad di un otro, siendo cu nan tur ta hende. P’esey e ta haya cu esaki ta un tarea cu e kier bin cu ne pa sigui splica cu nos tur ta ser humano y nos tur ta yiunan di Dios y niun di nos ta perfecto.
Lucha pa igualdad
E ta consciente cu un eleccion semper ta trece cambio y despues di 22 di september lo tin mas claridad di e futuro di e gobierno y parlamento actual. P’esey e ta bisa cu den cualkier funcion ya sea cu e ta den parlamento of pafo di dje, te hasta pafo di politica mes, e lo sigui cu su compromiso cu e comunidad LGBTA. “Esaki ta sali fei mi curason”, el a bisa.
Pero e lucha aki no solamente ta na fabor di e comunidad specifico aki, sino di tur esunnan cu ta sufri ya sea racismo, xenofobia, homofobia of cualkier tipo di discriminacion. E lo sigui lucha pa igualdad civil na Aruba, ya cu nos hendenan merece cu ta wordo trata di forma igual y sin distincion of discriminacion.
Sra. de Sousa-Croes mes ta bin di un wela di origen Cubano kende a sufri di discriminacion tempo cu el a bin Aruba. Su wela tabata den un matrimonio cu ta consisti di un hende di color blanco cu un hende di color scur; algo cu den nan tempo tabata un prohibicion. Parlamentario de Sousa-Croes a lanta mirando e tipo di discriminacion aki y esaki ta un di e motibonan cu tambe e ta lucha contra nan.
“Nos ta bin di un generacionnan cu sa kico kiermen discriminacion, y esey mi ta hiba den mi cu ta un sufrimento innecesario.” E ta haya cu si un di individuo kier discrimina ta su bon derecho. Pero e no por hacie di manera di trece odio y division den nos pueblo. Gobierno di un pais ta prohibi pa discrimina y den nos constitucion esaki ta para den su prome articulo, segun e parlamentario.
