Ayera mainta, un biaha mas comunidad Filipino a celebra ceremonia protocolario anual di hisamento di bandera y di ofrenda floral riba Wilhelmina Park, den cuadro di e 121 aniversario di nan dia di independencia.
E biaha aki e ceremonia tabata compaña cu e anuncio haci pa e consul honorario di Filipina na Aruba, Sra. Ami Henriquez-Mendez, cu no lo sigui realisa e funcion aki, debi na compromiso familiar. A haci e anuncio den presencia di Consul General di Filipinas na Hulanda, Sra. Lolita Capco kende tabata e huesped special den e ceremonia aki.
Pa 13 aña e consul honorario Henriquez-Mendez a representa e comunidad Filipino na Aruba. Pero e biaha aki e tin un compromiso como mama pa compaña su yiu, ainda menor di edad, pa bay Canada y sigui su estudio universitario.
E diplomatico no a sigura cu lo sigui eherce e funcion aki ora cu e ta bin bek Aruba. E ta considera cu e comunidad aki tin ‘hopi sanger fresco’ y e kier duna otro hende di su comunidad e facilidad pa eherce e funcion di Consul honorario di Filipina. E decision no a cay ainda, pero tin cuater candidato cu ta aspira pa asumi e trabou aki, cu ta demanda responsabilidad y sacrificio.
Segun Henriquez- Mendez, e trabou aki ta uno pisa, ya cu e comunidad aki a crece y nan ta consul honorario, pero nan ta haci trabou cu amor pa beneficio di nan pais. Aunke ‘Aruba ta brasa nos como un di nan, ainda nos ta stranhero,’ el a bisa.
E diplomatico Henriquez-Mendez tabata masha emocional ora cu durante e acto protocolario el a anuncia su retiro di e funcion aki. Pero igualmente el a gradici tur hende, y e tabata masha contento di por a conta cu e presencia di e halto dignatario di nos pais den e acto aki. “Nos ta masha contento, pasobra nos ta bin ripara cu Aruba a bin celebra cu nos e 121 aniversario di independencia di Filipinas,” el a bisa.
Tur aña, pa duna contenido na nan celebracion nacional, consulado di Filipinas a organisa e acto protocolario aki. E biaha aki a conta cu presencia di Gobernador di Aruba, Alfonso Boekhoudt; Presidente di Parlamento, Juan Thijsen, Prome Minister, Sra. Evelyn Wever-Croes; minister di Enseñansa Rudy Lampe; parlamentarionan y representantenan di e cuerpo consular.
Henriquez-Mendez a laga sa cu e ocasion aki semper ta uno special pa haci reconocimento na un grupo di Filipino cu a destaca nan mes na Aruba, poniendo e nomber di nan pais den halto. Te hasta a wordo duna reconocimento na e prome polis di origen Filipino di e cuerpo uniforma aki. “Den corto nos ta masha contento cu tur cos cu nos ta haya akinan na Aruba,” el a declara.
