Dia 8 di juni venidero American Airlines lo habri un ruta nobo. Esaki lo consisti di un vuelo semanal riba diasabra for di aeropuerto internacional di La Guardia na Queens,NY. E vuelo lo wordo realisa cu un avion tipo B737-800 cu un capacidad di 160 stoel.
Pa Aruba, esaki ta nifica un potencial pa crecemento adicional den turista nan Mericano a traves di diferente conexion via Merca.
Minister Dangui Oduber ta sumamente contento y orguyoso di mira e vuelo aki bira realidad. E ruta nobo ta habri mas posibilidadnan pa rutanan adicional for di mercado nan Mericano.
American Airlines actualmente ta operando cu vuelonan diario for di Miami, FL – Philadelphia, PA – Charlotte, NC. Den aña 2018 e aerolinea a trece un total di 170,338 pasahero. Actualmente e aerolinea ta number 2 den e mercado Mericano cubriendo 17 porciento. E industria turistico ta sigui demostra desaroyonan positivo pa nos destinacion, e biaha aki for di e sector di aviacion.
American Airlines ta un socio importante pa nos turismo y ta operando na Aruba ya desde aña 1971. Aruba su relacion estrecho cu American Airlines ta sigui hisa calidad di nos turismo y sigui fortifica e ruta nan existente cu Aruba tin cu e aerolinea pa mas di 48 aña caba.
Minister Dangui Oduber ta felicita tur stakeholder cu e noticia positivo aki cu ta ofrece posibilidad nan mas amplio pa yega Aruba y ta sumamente contento cu e logro aki pa cu turismo di Aruba. Un biaha mas ta keda demostra e exito di e maneho di turismo.
