Den un contexto di inflacion modera na Latino America y den cual su economianan principal ta contemplando recesion, e banconan central ta prepara pa uni na mercadonan emergente di Asia y Africa pa reduci tasa di interes.
Ta spera cu Brasil lo reduci e costo di debe proximo siman, pa prome biaha den mas di un aña, despues cu otro reduccion di inflacion a sorprende economistanan. E reduccion di e indice di prijs pa consumidor di Mexico a reforsa e perspectiva di flexibilisacion monetario y Peru ta considera haci mesun cos.
Na otro paisnan di e region, Chile a sorprende cu un bahada di 50 punto basico luna pasa y a indica cu lo por suavisa ainda mas su politica monetario e aña aki. Tambe Paraguay e siman aki a reduci su tasa clave te minimo den 8 aña, ya cu e inflacion bao di e obhetivo a permiti e autoridad monetario di e pais duna impulso na e economia debilita.
E expectativa cu Reserva Federal di Merca pronto lo baha tasa di interes ta anima e banconan central di America Latino pa haci mesun cos. Ademas, e caida di e indicenan di inflacion ta un señal di debilidad economico den e region cu, segun Fondo Monetario Internacional, lo bay crece cu 0,6% so e aña aki, e cifra mas abao den 3 aña, marca pa crecemento bao di 1% na Brasil y Mexico, e dos economianan mas grandi. Sin duda, e tasanan di interes tin un impacto limita na hopi pais di America Latino, pa motibo cu e sector informal ta frena o mitiga e efecto di e decisionnan di politica monetario.
