(NTN24/EFE) – Fondo Monetario Internacional (IMF) a reduci ayera e proyeccion di crecemento economico di America Latino te na1,6 % na 2018 y 2,6 % na 2019, cuatro y dos decimo menos, respectivamente, cu loke nan a calcula na luna di april pasa, debi na e caida di crecemento den e tres economianan grandi di e region, Argentina, Brasil y Mexico.
“E calculacionnan menos positivo ta refleha perspectiva mas dificil pa e economianan clave, debi na condicionnan financiero mas ahusta y e necesidad di consolidacion politico (Argentina), e efectonan continuo di welga y incertidumbre politico (Brasil), y e tensionnan comercial y incertidumbre encuanto e renegociacion comercial (Tratado di liber comercio cu Merca y Canada) y e agenda di e gobierno nobo (Mexico),” IMF a indica.
E calculacionnan nobo di e informe di Perspectivanan Economico Mundial di e Fondo a baha e crecemento di Brasil cu cinco decimo pa 2018,te 1,8 % y a laga e perspectiva pa 2019 sin cambio na 2,5 %, mientras cu a mantene e aña aki esun di Mexico na 2,3 % y a corta esun di aña venidero cu tres decimo te 2,7 %.
E institucion financiero dirigi pa Christine Lagarde a aproba recientemente un programa di asistencia financiero cu Argentina pa un valor di 50.000 miyon dollar y tres aña di duracion pa yuda stabilisa economia Argentino, despues di un abrupto caida di e peso Argentino. E Fondo a insisti den constata e ‘dramatico colapso’ di e actividad economico na Venezuela, y a remarca cu e produccion petrolero di e pais a baha di manera drastico, segun informe di agencia noticiero EFE.
