E cifra actual di desempleo na paisnan di America Latino y Caribe ta di 8%, ‘esun mas halto di e decada y lo por subi’, segun Oficina di Coordinacion pa Desaroyo di ONU (UNDCO) y Organisacion Internacional di Trabou (OIT) na Lima a alerta.
Esaki ta debe, entre otro factornan, cu e region por tin un crecemento di 0,5% na 2019, segun calculo di Comision Economico pa Latino America y Caribe (CEPAL), mas abou di esun cu a registra na 20189 di 0,9%, ora esey tabata considera como moderado y cu poco impacto den mercado laboral.
Ademas, den e reunion ey a precisa ademas cu, cu e panorama economico aki, ‘lo ta dificil pa por reduci e informalidad cu ta afecta e 50% di e luganan ocupa den e region, cu ta alrededor di 140 miyon di persona’.
Di su banda, e director general adhunto di Programa Exterior y Aliansa di OIT, Moussa Omauru, kende a yega na Lima pa e reunion, a resalta e importancia di e decente trabou pa e poblacion y a bisa cu ‘ta hopi mas cu un empleo, sino un componente special di Agenda 2030, pa haya un desaroyo sostenibel cu lo permiti elimina pobresa sin laga ni un hende atras’.
A destaca tambe e necesidad di haci frente pa un futuro di trabou cu e impacto di tecnologia, cambio climatico of evolucion demografico, hunto cu e desafio di un presente caracterisa pa desempleo halto, informalidad, desigualdad, persistencia di trabou infantil y trabou forsa, entre otro.
