(Infobae/ElPais) America Latino ta e capital mundial di asesinato: aunke e ta conta cu solamente 8% di e poblacion mundial,e ta concentra 33% di e asesinatonan cometi riba e planeta.

Na cabes di e lista di pais cu ta converti e region den esun mas violento di mundo tin El Salvador, Venezuela, Guatemala, Honduras y Brasil. Debi na narcotrafico y fenomeno manera ‘feminicidio’ Ciudad Juarez, Mexico, ta cerca di e top 5 aki; mientras Colombia tabata cerca den mas di un estadistica anual.

 

Mientras den e Triangulo Norte di America Central (El Salvador, Honduras y Guatemala) violencia a yega na extremo – desde 2013 e tasa di feminicidio di Salvadoreño a duplica, y ta mas di seis biaha mas esun di Estadonan Uni – e asesinato di hende muhe pa su genero ta surpasa e cifranan pa e poblacion total. “Hende muhe ta muri na man di hende homber di manera desproporciona den bon parti di America Latino,” tabata observacion haci pa Wall Street Journal.

 

Mexico y Brasil ta esunnan cu, pa nan enorme poblacion, a registra e mayor cantidad di morto violento, segun Comision Economico Pa America Latino y Caribe (CEPAL). Ta dificil comproba si e cifranan ey ta real, ya cu na Mexico solamente 10% di e victimanan a denuncia violencia machista prome cu nan morto (e mesun cifra cu na Argentina) y na 2017 tabatin 3.430 muhe asesina, pero 760 caso so a keda investiga como feminicidio, ya cu den algun estado no ta registra e delito como tal. Algo similar a sucede na Colombia, cu 1.002 muhe asesina: solamente 144 a keda procesa como violencia di genero.

 

Na Argentina tin un feminicidio cada 31 ora,  “un cifra cu no ta disminui a pesar di e gran mobilisacion social,” e diario Spaño El Pais a destaca. Argentina tin un colectivo fuerte di hende muhe cu ta reclama nan derechonan, desde esun mas basico, esun di bida, te na otronan manera e derecho di pago igual pa trabao igual. E movimento, cu ta propaga “aborto legal pa no muri”, ya cu e clandestinidad di aborto ta causa mas di un morto pa dia, a cuminsa na 2015 cu e marchanan contra violencia machista di e colectivo Ni Una Menos.

 

E denuncianan na Argentina di violencia no letal a yega na 86.700 en 2017. Ocho di cada 10 caso tin como victimario e pareha o ex-pareha di e denunciante. Un denunciante cu ta yega mucho laat na e instancia: un di cada cuatro victima a reconoce cu nan a sufri maltrato durante 10 aña prome cu nan a papia, y casi mita entre un y cinco aña. Abuso sexual, cu hopi biaha ademas ta afecta menornan di edad, ta ser silencia mas ainda. Den e ultimo decada casi 3.500 mucha Argentino a bira huerfano pa asesinato di nan mama.

 

Na Colombia ta muri tres muhe pa dia. Husticia ta profundamente patriarcal y tin tendencia di no kere e muhenan cu haci denuncia, hasta ta responsabilisa nan pa loke a sucede, y ta excusa e agresornan, segun expertonan a conta El Pais. Ta existi un solido “cultura di impunidad”, e hefe di e division pa asunto di hende muhe di Organisacion di  Nacionnan Uni na Colombia, Ana Guezmes a declara. E tin respaldo di e cifranan di Fiscalia: e impunidad ta yega na 96% den violencia di genero.

 

Na Mexico tambe e principal victimario (64% di caso) ta e pareha o ex pareha di e muhe. Segun e Instituto Nacional di Estadistica, mas di 12 miyon muhe ta sufri di violencia na nan cas y 8 miyon a ser choca, corta, kima y a yega na sufri di depresion. Cuatro miyon a reconoce cu nan a pensa riba suicidio, ademas di a teme pa nan bida na man di nan pareha.

Pero como cu e delito di feminicidio ta keda reserva na consideracion di e diferente estadonan di Mexico, tin algun cu no ta defini nan como tal y otronan, cu aunke nan ta defini nan, nunca a usa e categoria den registracion. Den ultimo 20 aña e tasa di homicidio a cambia pa hende homber na Mexico: prome el a baha y despues el a subi pa via di e guera di narcotrafico. En cambio, pa hende muhe el a keda mes halto. “E ta un epidemia cu no a conoce tregua pa mita (femenino) di e poblacion,” El Pais a conclui.

Na San Salvador Meghan Lopez, un experto Mericano den violencia familiar cu ta realisa su doctorado na Johns Hopkins University, ta investiga e impacto riba mucha di habilidadnan pa criansa di nan mayornan den ambiente peligroso y afecta ademas pa pobresa, segun coresponsal di The Wall Street Journal, Juan Forero, cu a mira un obra presenta cu ta midi 13 factor cu por causa problema despues ora yega na edad di adulto, manera violencia, abuso sexual, disfuncion familiar y abandono.

Aunke e trabao di Lopez na a termina ainda, el a haya cu 8 di e 13 factornan den su encuesta entre famianan Salvadoreño tin influencia. “Esaki ta astronomico,” Forero ta splica. Na Merca ta considera 4 factor un indice halto. “Riba escala nacional esaki ta significa cu e violencia ta ser cultiva di un generacion pa e siguiente,” WSJ ta observa.

Ta dificil pa pensa cu por kibra e ciclo di violencia, si ta pasa cosnan manera lo siguiente. Despues di e entiero di e hoben Andrea Guzman, mata na El Salvador pa un pandiyero, su asesino, menasa pa otro pandiyero, a negocia cu polis pa duna informacion a cambio di salba su bida. Y poco dia despues cu e la drenta prizon, su rivalnan a kere cu lo ta bon idea pa mata su mama, ora e tabata sali di prizon unda el a bishita su yiu. Di otro banda, Bryan Guzman, e ruman homber di Andrea, a pidi asilo na Merca y nan a nenga esey y e mester a bolbe na su pais. Awor su famia tin e scondi. E asesino tin proteccion, e victimanan no.