Como respuesta pa e creciente inmigracion di America Central, Estadonan Unidos a inicia e proceso pa corta e ayudo na Guatemala, Honduras y El Salvador, como represalia pa loke presidente Donald Trump ta considera falta di interes di e paisnan ey pa controla e salida di migrante rumbo pa Merca.
Trump a critica e paisnan ey y Mexico diabierna pasa, y diasabra Departamento di Estado a inicia e tramitenan pa cumpli cu su deseo. Mientras tanto, miles di persona cu ta huy di Centro America ta retando e capacidad di polis na frontera entre Merca y Mexico.
Departamento di Estado a manda un carta pa Congreso diasabra den cual ta informa di nan intencion di “ehecuta e orden di presidente” y “finalisa e programanan di ayudo exterior pa e Triangulo Norte, corespondiente na e añanan fiscal 2017 y 2018”. Es decir, cu ta trata di ayudo aproba caba. Gobierno Mericano ta bisa cu e kier “traha cu Congreso” den e asunto aki, lo cual ta indica cu al menos parti su plannan ta depende di Congreso, unda lo tin oposicion Democrata. Durante fin di siman Cas Blanco no a aclara si ta referi na keda sin ehecuta plannan ya aproba o di kier cambia presupuesto.
Diabierna pasa na Florida Trump a ataca Mexico, y a menasa di cera frontera sur di Merca completamente. De paso el a bisa cu e paisnan di America Central a organisa e asina yama ‘caravananan’ di migrante. Desde dos aña pasa, gruponan di migrante ta agrupa den caravana organisa cu ta garantisa mas siguridad y cierto orden ora yega frontera. Trump a ataca e caravananan publicamente y a yama nan un invasion di criminal.
Segun dato recopila pa Efe, na 2018 a destina 120 miyon dollar na proyecto na Guatemala, 80 pa Honduras y 58 pa El Salvador. Na 2017, 140 miyon pa Guatemala, 95 pa Honduras y 73 pa El Salvador. No a gasta algun di e fondonan aki y esakinan lo keda afecta pa decision di Trump, aunke Departamento di Estado no a publica detaye al respecto.
