Amen cu Sanger: Prome obra literario na Papiamento enfoca ariba homosexualidad

Sexualidad ta un tema cu te dia di awe ta causa hopi controversia. Entre e amienda di Union Civil cu a keda pega ariba mesa di gobierno y e discusionnan fuerte cu ta lanta cada bes cu e tema di homosexualidad aparece ariba medionan social, ta keda mas claro cu e tema aki ainda ta polarisa. Pa Joshuar Gomez, e tabata hopi importante pa skirbi un buki cu ta conta e experiencianan homosexual, for di un perspectiva Arubiano.

“Mi ta kere cu aceptacion ta un sintimento cu ta nace solamente for di un luga di identificacion. Pa e ser humano ta mas facil pa ta tolerante y comprensivo na momento cu un storia aheno tin un cara conoci. Pa con dificil of inconfortabel e storia aki porta ta, e cara conoci lo semper humanis’e. Di mesun forma, ta facil pa husga y dihumanisa e storianan cu nunca ta haya bos. ‘Amen cu Sanger’ a nace for di e necesidad pa e identificacion aki. Mi ta kere cu ta ora pa e experencianan LGBT wordo conta for di perspectivanan crioyo. Storianan di nos mesun hendenan, conta den nos propio lenga Papiamento.”

‘Literatura mester kibra baricada di taboo’ E meta di e autor ta pa pusha e baricada confortabel cu a wordo crea den e cultura literario na Aruba, unda ta invadi skirbi riba temanan taboo of controversial. Su obra ta conta e storia di un mucha homber homosexual cu ta haya su mes confronta cu temanan di violencia basa riba odio of ignorancia, religion su rol den forma mentalidadnan encuanto sexualidad, depresion, prostitucion y hopi mas. Cada capitulo ta introduci personahenan cu e Arubiano por facilmente reconoce of identifica su mes cu ne.

‘Amen cu Sanger’ ta un buki cu tin varios aña den proceso y finalmente Joshuar Gomez ta logra public’e. A purba public’e un par di aña pasa, pero tur e portanan na unda el a bati, a bisa cu Aruba no tabata cla pa un buki asina. Pero den colaboracion cu Papiamentistanan Zuleika Silva y Mila Zambrano, e buki awor ta riba mercado.

Cas editorial Red Soil Publishing

E buki den formato digital (e-book) ta disponibel pa pre-sale ariba e website redsoilpublishing.com, cual ta Joshuar Gomez su mesun cas editorial (publishing house) pa autornan di Aruba, Boneiro y Corsou. Gomez a funda Red Soil Publishing pa amplia e oportunidadnan pa escritornan na Aruba, Corsou y Boneiro. Gomez: “Escritornan nobo, escritornan cu experiencia, escritornan cu curashi… nos tur merece e oportunidad pa comparti nos pen cu e mundo. E meta di Red Soil Publishing ta pa introduci un perspectiva literario decolonisa, consciente di e herencia Afro-Indigena di Aruba y otro islanan den Caribe.