Ayera 22 di october tabata e dia “Wear it Pink” unda cu tur persona ta bisti cu un prensa color ros pa asina conscientisa riba e malesa di cancer di pecho.
Pa cu esaki, Joel Rajnherc ken ta fungi como director di ImSan hunto cu diferente trahadonan di ImSan y di ambulance a presenta e ambulance ros pa asina uni na e lucha di conscientisacion riba malesa di cancer di pecho.
Rajnherc a expresa cu for di 1 di april di aña 2020 ImSan tin e area di radiation oncology cu a bira funcional den colaboracion cu Miami Cancer Institute of Baptist Health na sur di Florida.
Te awor mas di 300 pashent cu diferente cancer a haya tratamento den area aki na ImSan igualmente 140 pashent cu cancer di pecho y na nivel mundial cada aña 1.3 miyon persona ta wordo diagnostica cu e malesa aki.
Pa via di esaki, nan kier haci visibel e apoyo den un di nan ambulance cu color ros cu lo permanece den funcionamento durante un tempo y asina por promove e conscientisacion riba e malesa aki.
