Bou circunstancianan special lo haci posibel pa ambtenaarnan den organonan publico di islanan BES por haya contratonan pa producto of servicionan na Boneiro, Statia y Saba.
Pa haci esaki posibel, secretario di estado Raymond Knops (CDA) lo ahusta e regulacionnan den e decreto pa ambtenaarnan di BES, asina el a anuncia den un carta pa Tweede Kamer di parlamento Hulandes dialuna ultimo.
Den 2018 tabatin un conmocion despues cu a sali na cla cu e comisionario di gobierno na Statia a outsource renobacion di Statia Emergency Operation Center (SEOC) pa un ambtenaar di Statia kende tambe ta doño di un compania di construccion. Esaki no tabata considera solamente como un conflicto di interes pero tambe tabata contra e decreto di ambtenaar di BES.
Knops su respuesta riba e incidente tabata pa pidi e gobiernonan di Boneiro, Statia y Saba pa haci inventario di tur ambtenaar y nan actividadnan pafo di nan trabou como ambtenaar, y tambe pa identifica kico ta nan actividadnan pafo di trabou.
Tambe e secretario di estado a pidi e entidadnan publico y director di Rijksdienst Caribisch Nederland riba nan experiencianan cu ambtenaarnan cu actividadnan na banda di nan trabounan como ambtenaar.
“Basa riba e respuestanan cu nos a ricibi, ta parce cu tin actividadnan na banda, di parti di ambtenaarnan di Caribe Hulandes BES ta algo integral cu ta bay cu e escala chikito di e islanan. Ademas cu e echo cu pa ningun rason tur actividad adicional tin influencia riba trabou como ambtenaar, ta mustra cu den practica, den casonan excepcional, contrata un compania di un ambtenaar ta inevitable”, Knops a skirbi den su carta.
E regulacionnan den e decreto, specificamente articulo 51, actualmente no ta permiti esaki. “Pa e rason aki mi ta preparando un provision adicional, unda, bou cierto condicionnan, lo haci posibel pa desvia di e regulacion”.
