Dialuna ultimo hopi cos a wordo bisa den Parlamento ora a cuminsa trata e amienda di Codigo Civil. Hopi di esunnan di e grupo LGBT como tambe representantenan di iglesia a sinti nan mes ofendi di hopi di e palabranan cu a wordo comparti den e prome fase di e reunion publico aki tratando un amienda cu algun ta bisa ta bay pasa y otronan no.
Segun presidente di Fundacion ALFA, Sr. Maikel Kelly, e reunion a cuminsa bastante positivo y ta lamenta cu e grupo religioso cu tabata presente no a mantene nan mes na cierto afspraak y a tira palabra hopi ofensivo na e comunidad LGBT. Sr. Kelly ta bisa cu segun Articulo 1 den Aruba su constitucion bo no mag di discrimina hende locual e gran parti di Parlamento obviamente ta haciendo awor. ”E ta lastima cu e tabata asina ofensivo y ora cu Parlamentario Sra. Evelyn Wever Croes a papia el a purba scapa su mes di uza palabranan derechonan humano, pero despues el a bay totalmente riba e parti contrario. Di biaha el a nombra e parti di religion como un defensa. Mi no ta kere cu el a tuma cuenta cu politica y religion ta separa for di otro.” Sr. Kelly ta bisa. Sr. Kelly ta agrega cu Sra. Evelyn tabata mas concentra den defende su votonan y hasta pa defende esey el a bisa cu por traha leynan separa pa e comunidad ”ey” manera si nan ta forma un parti di ”un especie sobrenatural”. E comunidad LGBT ta sinti como si fuera cu kier introduci un tipo di Apartheid akinan na Aruba cual a wordo elimina den añanan 1980 na Sur Africa. ”Den su palabranan, Sra. Evelyn a crea e impresion ey pa nos cu tabata sinta ta scucha den audiencia el a hiba nos bek den tempo. E amienda aki mester a wordo regla na Aruba caba di tempo cu nos a haya nos Status Apart den Reino pasobra e ta skirbi hopi cla den Articulo 1 pero nunca niun hende a mantene esey.” Sr. Kelly ta bisa. Como Rubiano, Sr. Kelly a haya cu hopi di e remarcanan di e partido geel tabata denigrante.
Si derecho igual ta e meta, tin otro caminda pa yega na dje
Parlamentario Sra. Evelyn Wever Croes lider di partido M.E.P. ta bisa Bon Dia
cu e no a uza ningun palabra ofensivo ni su coleganan di parti di partido anto si algo por a zona ofensivo e ta pidi su disculpa pasobra esaki no tabata e intencion. Sra. Evelyn ta splica Bon Dia cu no ta necesariamente e amienda akinan mester pa por regla asuntonan di derecho humano cu riba su mes no ta uno corecto anto esaki tabata su punto principal. ”Ami lo a prefera di mira cu ta gobierno a bin cu un ley pasobra e cos aki ta algo pa gobierno bini cun’e carga pa henter comunidad y no un ley di un hende of partido.” Sra. Evelyn ta bisa Bon Dia.
Sra. Evelyn ta bisa cu eigenlijk tabata na e gobierno pa bin cu un ley caminda ta elimina tur clase di discriminacion anto percura pa derechonan igual anto no a bini cun’e. Sra. Evelyn ta agrega cu preferiblemente lo tabata ta pa Parlamento trata un ley di iniciativa cu ta cana su caminda apropiadamente anto no un amienda. ”Nos ta den un situacion cu loke cu Desiree a presenta tin chens cu e no ta pasa anto mi a wordo sumamente mal comprende pasobra mi no a bisa traha un ley separa pa hende di otro orientacion sexual. Mi a bisa cu bo por regla derechonan otro manera den otro ley no necesariamente den ley di matrimonio.” Sra. Evelyn ta splica Bon Dia. Parehanan por ehempel cu no ta casa y a biba hopi aña hunto no tin ayudo despues di separacion segun Sra. Evelyn no ta algo cu mester necesariamente regla via ley di matrimonio cual ta keda entre hende homber y hende muhe. ”Den e mesun ley di “Alimentatie & Zorgplicht” caminda cu ta regla cu casanan mester zorg pa otro, bo ta bisa: ‘Dan wel als gehuwd hebben samengewoond’. Kiermen bo ta duna mesun reconocemento como un pareha casa na esunnan cu a biba hunto.” Sra. Evelyn ta bisa.
Comunidad religioso ta keda contra
Hoben representante di LGBT Youth Aruba, Oneal Rodgers ta splica Bon Dia cu no ta un chercha nan ta haciendo anto cu ta bringando pa nan derechonan cu nan nace cun’e. ”Nos no ta puntrando pa casa, nos ta puntrando pa union civil cual ta un registracion entre dos persona sea homo of hetero sexual. Nos no ta puntrando pa casa den un misa, mi no ta compronde for di unda e grupo religiosonan ta biniendo. Nos no ta trapando riba nan pia pero nan si ta trapa riba nos y haci nos dolor” Rodgers ta bisa Bon Dia. Obispado mes a bisa cu e eigenlijk e no ta husga union civil anto ta parce cu iglesia ta mal informa nan mesun parokianonan y mal informa pueblo na loke ta pasando segun fundacion ALFA. Den e carta cu representantenan religioso a entrega Parlamento siman pasa ta para cu door cu Hulanda a introduci casamento di mesun sexo , esaki a causa un consternacion grandi na mundo y 78 pais a bin cu leynan masha severo y castigonan pisa contra practicanan homosexual y 10 pais na mundo a bin cu e ley di morto pa esunnan cu ta practica homosexualidad. Esaki tabata segun e carta ta indica, consecuencia di e ”ley inmoral” cu Hulanda a introduci unda miles di persona cu otro orientacion sexual ta wordo asesina cruelmente. ”Nos no tin nada contra e Homonan y Lesbiannan, nan tur ta yiunan di Dios. No ta tur ley cu Hulanda tin nos tin cu acepta y biba cun’e. E escogencia y fantasia di matrimonio cu mesun sexo ta inaceptabel pa e pueblo Cristian Catolico y otro religionnan cu Aruba tin.” E comunidad religioso ta keda contra pa motibo cu pa nan esaki tur ta indicacion cu parlamento kier pasa un ley scondi den tur scuridad traicionando Dios y pueblo. E bataya pa igualdad y mision di Dios no ta e unico cosnan cu mester wordo trata dialuna awor den e siguiente fase di e reunion publico pasobra manera cu e amienda mes ta indica ta masha hopi otro asunto tin pa atende.
