Ayera atardi minister di infrastructura/vice prome minister Otmar Oduber (POR) a tene un rueda di prensa pa toca e tema di e problemanan andando actualmente na Seroe Cristal. Ambos compania na e sitio ta operando sin permiso di construccion y gobierno a tuma accion riba esaki.
Conhuntamente cu tur departamentonan concerni despues di un reunion ayera, gobierno a enfatisa cu tiramento di sushi unda cu ta por medio di companianan no lo wordo tolera y lo bin mas accion.
“Esaki ta conta tanto pa hendenan cu na un forma personal ta bashando sushi sea ta na buraconan, den rooinan of mondinan rond Aruba. Of companianan haciendo esaki sin permiso necesario, cu gobierno lo actua contra tur hende cu no ta cumpli cu e ley,” minister Oduber a declara ayera. Diamars mainta a tuma luga un accion na diferente areanan di Seroe Cristal. Tabata tin basta critica den e ultimo dianan riba e circunstancianan cu a yama tur e actividadnan ki cu tin na momentonan aki rond di Seroe Cristal manera nos a publica tambe algun dia pasa. Den cuadro cu esaki minister Oduber a cuminsa reuni caba den e prome dianan di trabao cu tur departamento concerni, cual ta DOW, DNM (Departamento di Medio Ambiente) y DIP (Departamento di Infrastructura Publico) pa cuminsa traha riba e asunto aki. Locual ta pasando na Seroe Cristal a haya basta atencion den comunidad y den media . Siman pasa mes e departamentonan hunto cu gobierno a haci un bishita na e diferente actividadnan cu ta tuma luga.
Instalacionnan sin permiso
“A constata en todo caso di parti di DOW cu tur dos compania cu tin actividad den e momentonan aki ta operando sin un bouwvergunning. Nan ta wordo skirbi tambe ariba esaki pa por busca y entrega un permiso pa loke ta trata e instalacionnan cu tin eynan cu ta sin permiso,” minister Oduber a comenta. Tin condicionnan cu gobierno ta pone pa esaki tuma luga mas rapido cu ta posibel si no lo mester ontruim e parti aki si no ta cumpli cu e exigencianan pa loke ta trata e bouwvergunning, segun e mandatario. Di parti di DIP a constata cu cierto momento tambe tabata tin terenonan publico di gobierno pafo di e tereno eigendom. Segun minister Oduber, tur dos compania tabata operando riba tereno propio pero cierto momento uzando terenonan publico rond pa pone materialnan of pone actividadnan cu nan tabata haciendo. DIP lo skirbi e compania cu a haci esaki y duna nan un laso di tempo pa piki tur cos tambe loke tin ariba e parti aki.
Compania cu no ta cumpli cu ley
Ayera minister Oduber a combersa un rato cu minister di Husticia caminda ta constata cu di e dos companianan aki, un so tin un hindervergunning.
Esey ta nifica cu e otro compania no ta cumpliendo cu su obligacion legal di tin un hindervergunning. Y di parti di minister di Husticia e la laga sa cu e lo tuma esaki over bao departamentonan cu ta responsabilisa pa esaki pa mesora atende cu e parti aki. Esaki lo por nifica cu lo para operacionnan di e compania aki.
Advertencia pa otro companianan
Pa loke ta trata e aspecto di naturalesa y medio ambiente , den e proceso di bishita cu a tuma luga por a constata cu en berdad tin un compania cu ta traha materialnan for di cement, segun minister Oduber. Den e caso aki kiermen cu nan ta traha beton, e mix, como tambe blokinan. A base di locual DNM a constata, lo tuma luga un midimento di loke ta pasando eynan cu e cement cu ta bula den e aire eynan cu por ta influencia e calidad di bida di esnan cu ta biba den e area.
Minister Oduber: “Esaki ta e accionnan cu a tuma luga a base di e gran cantidad di criticanan cu tabata tin. Nos kier mustra riba e hechonan tambe cu esaki no lo ta e ultimo. Esaki lo ta un di e prome accionnan cu a tuma luga pa pone ordo bek na nan luga. Y nos ta manda un advertencia pa otro companianan cu ta kere nan por opera sea ta sin un hindervergunning of permiso di gobierno.” A papia tambe riba locual ta deposito di sushi y diferente materialnan cu ta wordo deposita den terenonan cu no ta dump. “DNM a cuminsa e proceso di cierto proces verbal na OM y cu lo continua pa companianan cu no tin permiso di gobierno pa por deposita sushi na un otro sitio cu no ta Parkietenbos,” minister Oduber a declara.
Bisiñanan kier a lanta caso
Na Seroe Cristal algun bisiña a dirigi cartanan unda a indica cu na cierto momento lo kier cuminsa un caso segun e mandatario. Pasobra e ta bisa cu en berdad no ta mucho a wordo haci den pasado pa haci un bishita y coregi por ta algun cosnan cu ta robes. “Mi ta kere cu nos ta mandando un bon ehempel pa comunidad cu e tipo di actitudnan aki no lo wordo tolera mas. Nos tur mester cuida nos naturalesa y medio ambiente pero mas cu tur cos nos tur tin cu mantene nos mes na leynan y reglanan cu tin vigente na e momentonan aki,” minister Oduber ta bisa. E mandatario a subraya cu ta un caminda so nos conoce den nos leynan cu tin pa tira sushi cual ta Parkietenbos. Oduber: ” Y nos sa cu Parkietenbos ta un problema. P’esey nos tin un team trahando den e prome cien dianan nos lo kier bin cu un solucion temporario y duradero pa loke ta trata maneho di sushi akinan na Aruba. Henter e team lo ta envolvi, hunto cu Serlimar y expertonan. Lo acerca TNO y otronan riba e tereno aki.”
