Ayera a wordo mira e resultado di e dia cu gobierno a declara como liber, creando un discusion specialmente den gremio comercial manera Camara di Comercio (KvK), si legalmente e dialuna di Carnaval tabata uno berdaderamente liber, sin tin Carnaval manera e ley mes ta prescribi.
Den ley ta poni cu si no tin parada di Carnaval, no tin dialuna liber. Sinembargo gobierno den conseho di minister a dicidi pa duna liber anticipando riba un cambio di ley. Tambe gobierno a haci un apelacion na e companianan pa duna liber ayera.
Ta asina cu gobierno lo bin cu un adaptacion di e ley di tal forma cu e dialuna liber aki no ta bay ta mara na e parada di Carnaval mas. Sino cu e ta bay ta mara na e Diaranson di Shinishi. Kiermen dos dia prome cu e Diaranson di Shinishi, e ta bira liber, y asina e ley no ta referi nada mas na Carnaval.
Mientras cu ayera -apesar cu cierto negoshi a habri- e ambiente cu a domina tabata uno di un dia liber. For di mainta grupo di famia a dicidi di disfruta di e dia di ayera. Algun di nan a bay beach. Otronan a prefera bay cinema of bay come den restaurant.
Mayoria di establecimento cu a habri tabata restaurant y algun supermercadonan. Mientras negoshi chikito manera den caya grandi a prefera di no habri. Tambe sector bancario no a habri y cierto oficina relaciona cu producto/servicio a abstene di habri y asina prefera di evita un pago di 200% pa esunnan cu a traha. Mientras cu absolutamente e sector publico no a traha ayera.
