Activistanan ambiental, kende a causa disturbio den e capital durante 10 dia, a blokia e entrada principal di London Stock Exchange ayera, pegando nan mes cu lijm riba e porta mientras nan tabata bisti pantaya LED bisando ‘emergencia climatico’.
Grupo chikito di demostrante tambe a subi riba e dak di un trein na stacion Canary Wharf den districto financiero oost di London, y a blokia e caminda pafo di e banco di inversion Goldman Sachs, mientras nan a enfoca riba e centronan financiero di e ciudad riba nan ultimo dia di protesta pacifico.
E grupo Extinction Rebellion a bisa cu tabatin como meta e industria di servicio financiero pa motibo cu nan ta ‘financia destruccion climatico y ecologico’. Activistanan a tene poster bisando ‘business as usual = death’ y ‘don’t jail the canaries’. E demostrantenan a wordo hiba for di e luga pa polis den van.
E exchange, cu no tin un ‘trading floor’, a continua funcionando normal.
Desde dia 15 di april, demostracionnan pacifico contra cambio climatico a causa disturbio di trafico rond di London door di enfoca riba brug, interseccion, y trein. Mas di 10,000 agente policial a wordo manda y mas di 1,100 persona a ser aresta, aunke apenas 70 a wordo acusa di un crimen of delito.
Extinction Rebellion ta bisa cu a caba su ultimo blokeonan na Marble Arch y Parliament Square ayera. E grupo a gradici ciudad di London den un declaracion, bisando: “Nos sa cu nos a causa disturbio na boso bida. Nos no a haci esaki por nada. Nos ta haci esaki unicamente pasobra esaki ta un emergencia.”
