Diadomingo a surgi un discusion riba rednan social pa loke ta trata e protesta pacifico cu e activista ambiental Nigel Maduro ta bin haciendo na diferente beach unda tin varios construccion di hotel tumando luga, pa esaki e minister encarga cu Turismo a afirma cu e protesta aki di diadomingo ultimo “tabata uno agresivo y perhudicial” y a urgi nan reflexion riba e impacto di tal comportacion contra e turismo di Aruba.
Mirando e declaracion aki, Nigel Maduro a dicidi di haci un “Live” riba su Facebook page pa asina duna su banda di medaya tocante loke a sucede na Baby Beach e dia ey caminda segun el a sigura, “un medio di comunicacion local, turistanan, hende local y negoshinan a cambia full un narrativa cu no ta berdad.”
Ayera den un declaracion, minister di Turismo Dangui Oduber a señala cu “un biaha mas nos ta lamenta e tipo di e accionnan aki, cual mi ta considera como accion violento, accionnan agresivo y un atentado contra nos turismo.”
Pa esaki, Nigel Maduro a dicidi di bin dilanti y splica cu “nan a bin pinta nos como hende loco y agresivo y esey no ta berdad.”
El a conta cu a organisa un Beach Party e cual ta un accion di protesta pacifico na Baby Beach diadomingo ultimo unda for di oranan trempan mainta ora nan a yega nan a haci un Beach Clean Up unda el a sigura cu tin video cu ta mustra con hendenan a laga e beach e dia anterior. “Nan a laga hopi sushi, nos a cuminsa piki tur e sushi cu nos mannan y hasta na Big Mama, nos tin video con tur e bari di sushi tabata yen y a nos a bay limpia y haci espacio presentabel y bunita pa hendenan cu ta bin na e Beach Party, pa hendenan local y turistanan cu ta bin Baby Beach y wak e bunita,” el a bisa.
Nan a pone Aruba su bandera na e tentnan pa mustra cu esey ta Aruba su tera y eynan nan a ripara cu e hendenan di e restaurant a bin set up e tentnan y a bin mas cerca di e palapanan , “esaki ta e motibo di pakico nos a bin na e Beach party pa nos re-clean nos lama cu semper ta wordo kita pasobra nan ta pone beach tent, beach chairs y tur cos cu ta pa turista y localnan ta keda patras,” Maduro a bisa.
E tentnan a yega na unda nan tabata ubica na e palapanan unda Maduro a sigura cu esey tabata pa crea espacio pa “nos hendenan” y a pone un beach tent dilanti e palapa unda Maduro tabata ta. “Nos view full blokia, nos a hala nan atencion y aparentemente tabata local esun cu a bay huur e tent y nos a bisa nan ‘hey, bo ta local, nos tin un espacio pa bosonan bao di e palapa bo mag di join nos’ pero e bisa cu e no kier y ta prefera di paga 100 florin.”
Pa Maduro, esaki ta algo inhusto y desigualdad di e beachnan di Aruba “cu e hendenan cu tin cierto privilegio anto tur otro local of turista ta haya e beach blokia y bo no ta wak e view “el a bira un discusion hopi grandi, nombernan a wordo yama, insulto a bin riba mi, nan a insulta mi apariencia, despues e trahadonan di e beach tent a bin insulta y intimida. A mi a just bisa, bo no tin cu haci e cos ki, nos kier just espacio pa wak e view.”
Den tur e discusion aki, polisnan a yega y segun Maduro a menciona, “nan tabata di acuerdo cu nos pasobra a nan tambe ta sinti’e, cu nan ta blokia e view y esaki no ta prome biaha cu ta pasa den servicionan di beach tent, e ta pasa varios biaha,” el a bisa.
Opinion tocante e incidente ta dividi, cu algun persona subrayando cu en berdad e beach y palapanan ta publico y cu no tabata corecto cu e persona aki a core cu e turista pa simplemente pone su pertenencianan banda di un palapa cu el a “reserva”.
Di otro banda algun otro usuario ta compronde y ta apoya e causa, mirando cu poco poco turismo ta apoderando di varios espacio publico lagando e localnan cu poco oportunidad pa disfruta. Pero hopi ta subraya cu e manera con e persona local aki a actua y core cu e turista y su yiu, no tabata e manera corecto.
Maduro a enfatisa cu e medio local na momento di informa, a cambia e mensahe di loke nan tabata kier bisa di e protesta y a enfoca riba turistanan cu tabata “insulta nan” y nan a keda splica riba cierto cosnan cu no a pasa “esey no a pasa. Bo ta letterlijk gañando e hendenan”, manera el a expresa.
Den su opinion, e tipo di turista cu Aruba kier ta esun cu ta respeta y comparti espacio, e Beach Party a funciona den su edicionnan anterior sin presencia di media “pero ora media a wordo envolvi di biaha tur hende a bisa ‘e hendenan aki ta agresivo y violento’ pero e no a pasa cu tur e otronan, e unico momento cu nos ta para pa nos tera ta ora cu ta haci inhusticia.”
Ademas, a señala cu esaki ta e situacion na e momentonan aki na unda te ainda e Hotel Secrets baby Beach no a habri ainda “imagina ora e hotel lo habri.”
El a sigui splica cu no ta media cu a daña su beis, ni turistanan, ni e local cu e beach tent e motibo di pakico el a dicidi di bin dilanti ta debi cu minister Dangui Oduber “ta bin pinta e medio ambientalistanan y artistanan cu tabata eynan manera violento y agresivo, cu ta ataca, intimida, insulta e turistanan, nos tin video y potretnan cu tur hende por bin na nos Beach Party, e narrativa cu nan tin di nos please no cay pe,” el a bisa.
E tema aki ta uno cu frecuentemente ta den medionan social, treci pa dilanti sobretodo pa ciudadanonan local cu ta mustra nan malcontento pa motibo cu nan ta sinti cu poco poco nan ta perde nan derecho di disfruta di e beachnan publico di nan pais pasobra turistanan tin e preferencia.
