Amazon, cu ta continua sufriendo critica intenso pa su tratamento di trahadonan di warehouse durante pandemia di coronavirus, a tuma un stap mas profundo den e controversia. E compania diabierna a despedi otro trahado di warehouse kende a protesta contra condicionnan laboral di e compania. Esaki ta e di seis despido conoci publicamente, mientras empleadonan ta aumenta keho cu Amazon no ta protehando nan for di coronavirus.

Gerald Bryson, empleado di warehouse di Amazon na Staten Island, a bisa CNET diamars cu a despedi su persona pa uso di lenguahe vulgar. Ademas, Derrick Palmer, kende tambe a organisa protesta na e mesun facilidad y ta un di e criticonan mas verbal di su dunado di trabou, a bisa cu el a ricibi un advertencia por escrito pa violacion di protocol di distanciamento social, pero ta sigui traha cu e compania. “Tabata djis retribucion pasobra mi a organisa y protesta”, segun Bryson, un residente di Staten Island kende a traha pa Amazon pa un aña y mey. “Mi ta disgusta, mi ta sinti viola.”

Amazon a bisa cu a mira Bryson ta ter y degrada un colega na pia di trabou riba dia di un protesta. E compania a conduci un investigacion y a colecta declaracion di seis empleado como testigo. Bryson tambe a admiti na su acto y lenguahe, segun e compania.

Vocero di Amazon, Rachel Lighty a bisa: “Nos ta respeta e derechonan di empleadonan pa protesta y ta reconoce nan derecho legal pa haci esaki, pero e derechonan aki no ta duna inmunidad contra mal actuacion, incluyendo esunnan cu ta acosa, discrimina of intimida otro empleado. Amazon tin un politica estricto di cero tolerancia pa cualkier tipo di acoso, discriminacion, intimidacion, of lenguahe inapropia contra otro empleado.”

Retiro di Bryson y disciplina di Palmer ta sigui accionnan similar di Amazon dirigi na empleadonan kende a critica e compania durante e pandemia. Siman pasa, e compania a confirma cu a despedi tres empleado activista: trahadonan di tecnologia Emily Cunningham y Maren Costa, como tambe trahado di warehouse Bashir Mohamed. Luna pasa, a despedi Christian Smalls, kende tambe a yuda organisa e demostracionnan na Staten Island, y Courtney Bowden, un trahado na Pennsylvania kende a pusha pa mas dia liber cu pago pa trahadonan part-time.

E despidonan ta yega mientras Amazon ta enfrenta mas presion di su forsa laboral durante brote di coronavirus, cu trahadonan ya caba organisando un cantidad di demostracion na e pais pa pidi condicionnan laboral mas sigur. Hopi di e trahadonan aki ta teme cu nan warehouse ta un potencial incubador pa e virus y cu nan por transmiti esaki na nan famia y clientenan di Amazon. Amazon ta bisa cu tin hopi procedura pa tene e sitionan di trabou aki safe.

E siman aki tabatin un protesta grandi nacional planea, cu 300 empleado di Amazon di 50 facilidad inscribiendo pa ‘call out sick’ di nan trabou. Amazon a bisa cu mas di 250mil hende a presenta na trabou diamars, hasta mas cu siman pasa, y a bisa cu participacion den e demostracionnan tabata ‘exagera’.

Na mes momento, Amazon ta bou presion pa cumpli cu e aumento den orden online di clientenan cu ta forsa pa keda cas. E compania ta druk agregando na su forsa laboral, despues di contrata 100mil trahado caba. Siman pasa, a anuncia otro ronda pa contrata 75mil empleado adicional.

Amazon hopi biaha ta defende e despidonan aki bisando cu ta respeta e derecho di e trahadonan pa protesta, pero cu esey no ta duna nan inmunidad contra tur politica interno. E compania tambe ta bisa cu a traha duro pa protege su trahadonan di warehouse, conduciendo chekeo di temperatura, ofreciendo mondkap y glove y continuamente haciendo facilidadnan limpi. A pesar di e esfuersonan aki, a publica reportenan nacional tocante decenas di infeccion di coronavirus na warehouse di Amazon.

Palmer y Bryson a bisa cu nan tabata kier a protesta publicamente despues cu un empleado na nan facilidad a contra coronavirus luna pasa y management incialmente no a bisa e trahadonan. Nan a pidi pa cera e warehouse pa varios dia pa un limpiesa completo, cu empleadonan ricibiendo pago durante e tempo ey. Nan a organisa dos protesta, un na fin di maart hunto cu Smalls. Bryson y Palmer a organisa un segundo protesta un siman despues, y Bryson a keda suspendi pa un siman poco despues y despues retira. Palmer a ricibi su advertencia despues di e protesta.

Desde e tempo ey, no a cera e warehouse, y Bryson, kende a tuma tempo off den simannan recien, a bisa cu mas empleadonan a bira malo na e facilidad.

Palmer, di 31 aña di edad kende ta biba na New Jersey, a bisa cu management di Amazon ta tumando represalia contra e trahadonan aki pa castiga comentarionan negativo contra e compania. El a bisa cu e ta sigui bay trabou, pero a dicidi di traha menos ora, agregando cu manager awo tin’e bou scrutinio pisa.