Diasabra ultimo na e clubhouse di Kiwanis Club of Palm Beach, Amateur Baseball Bond Aruba (“ABBA”) a organisa nan congreso anual cu ta wordo stipula door di e statuut di ABBA.
Despues di un play-off final sumamente exitoso cu a tuma luga na april ultimo, a congreso anual a conta cu record nobo di presencia dor di e ekiponan miembro. Un total di 11 organisacion a haci acto di presencia for di un total di 13. E congreso tambe tawata conta cu presencia di entrenadornan di Subsidie Commissie cu ta Eugene Kingsale y Carlos Gonzales. Mester remarca cu e congreso a bay den bon ambiente caminda cu diferente puntonan a wordo presenta incluyendo votamento pa 4 bestuurslid nobo. E president actual di ABBA, Sherwin Howell, tambe a presenta su vision pa e baseball general di pa nos isla di Aruba incluyendo e desaroyo di nos liganan y seleccionnan di Aruba, Tambe ta importante pa nota cu e siman anterior, e organisacionnan a tene un reunion extraordinario y vota pa cambionan den e reglanan casero cu mester a wordo actualisa. E organisacionnan a aproba e cambionan y pues di reglanan casero revisa lo ta aplicabel pa e campeonato 2017. E Campeonato A y AA ta planea pa cuminsa den e prome siman di juni.
