Ken no ta gusta un chuculati cayente ora ta un tiki friu of ki mucha no ta gusta saboria un ijscream di chuculati? Pues awe ta un dia special pa celebra debi cu chuculati ta e producto principal di ‘cacao,’ cual ta considera como un producto di luho for di temponan antiguo.
Amantenan di chuculati ta celebra cu awe 7 di juli ta Dia Mundial di Cacao. Riba e mesun dia na aña 2010, Organisacion Internacional di Productornan di Cacao y Academia Frances di Maestronan di Chuculati a otorga e distincion aki pa honra na cacao su propiedadnan y beneficionan.
Cacao ta un fruta di origen tropical cu tin e nomber cientifico ‘Theobroma Cacao’, cu na Griego ta nifica “e alimento di e diosnan.”
Su origen ta, segun algun investigado, ta ubica na Region Amazonico entre riu Amazonas y riu Orinoco. Supuestamente, poblacion mesoamericano a transporta e cacao te America Central y di eynan a bay Sur America y Mexico, hayando evidencianan di su uzo ritual den cultura di olmeca.
Entre algun cultura precolombino a utilisa e cacao como moneda, loke ta nifica cu tabata un producto di hopi balor.
Den investigacionnan arkeologico conduci mas di un decada pasa a haya evidencianan di mas di 5.000 aña di cultivo y consumo di cacao di parti di e cultura mayo-chinchipe-marañon, asina como intercambio comercial cu otro culturanan di e costa, na Amazonia Ecuatoriano.
A haya copinan y resto di e casca di e cacao den estudionan haci riba canicanan cu ta di 1.750 A.C. na Veracruz y na Honduras estudionan arkeologico ta calcula e consumo di cacao for di aña 1.000 A.C.
Europeonan a conoce a fruta aki despues di proceso di conkista y colonisacion di America, considera hopi despues como un articulo di luho na Europa.
Chuculati ta un producto procesa di cacao cu a ser introduci na Europa na siglo 56 pa Spañonan, cual a bira hopi popular den e realesa y clasenan mas halto.
Un Monasterio di Piedra tabata e prome luga unda a elabora e prome chuculati na Europa na aña 1524.
E cacao tin un forma di un papaya cu ta pisa aproximadamente 450 gram ora e ta hecho. E ta contene entre 30 pa 40 simia di color bruin, cu un smaak zoet y nan ta cubri di un pulpa blanco dushi comestibel.
Generalmente e cosechanan di cacao ta tuma luga dos biaha pa aña: ora yobidanan ta bay cuminsa y ora nan ta caba. Den e proceso di recoleccion y procesamento di cacao ta existi e temporada di cosecha ora e fruta ta maduro lo cual ta tarda entre cinco pa seis luna. Despues ta saca e simianan y ta pone nan riba un blachi di banana. E proceso aki ta dura entre 5 pa 7 dia unda e pulpa ta desintegra y por mira cambionan den e simia cu ta bira di color biña pa bruin y su smaak zoet ta disminui.
E simianan aki ta poni riba vloer pa solo por seca nan y aki ta unda nan color bruin y aroma ta concentra mas ainda. Siguientemente, e granonan ta bay den temperatura halto y un bes cu el a bira mas tosta, ta separa e casca di e simia. Por ultimo nan ta mula e granonan aki y ta saca e vet di e cacao pa e fabricacion di chuculati of otro productonan di cacao. Su composicion ta consisti di 35% fibra, 23% proteina, entre otro.
Entre su propiedadnan y beneficio di cacao por menciona cu e tin propiedadnan antioxidante, e ta disminui nivelnan di colesterol, stress y tension arterial y ta reduci e riesgo di diabetes.
E consumo di cacao ta regula e rendimento y capacidad intelectual y cognitivo. Simianan y blachinan di cacao ta ser uza den medicina pa cura dolornan como asma, diarea, colico y tosamento.
Un palo di cacao tin un haltura di 4 pa 8 metro y ta tarda entre 5 pa 6 aña pa por duna fruta. Su habitat ta boske tropical di clima calido y su nivel di produccion ta depende di e condicionnan ambiental di e zona unda ta cultiva.
Mester haci un mencion special na paisnan manera Venezuela, Colombia, Peru, Bolivia, Mexico y Trinidad y Tobago na unda e calidad di e cacao ta reconoci mundialmente. Pero e principal productor di cacao ta Costa di Marfil cu 38% di e produccion na nivel mundial.
Entre otro productonan di cacao ta existi esun en polvo y manteca di cacao pa elaboracion di chuculati.
Un hecho interesante tocante cacao ta cu Cristobal Colon tabata e prome persona Europeo cu a purba un producto deriva di cacao cu a ser procesa pa e indigenanan Maya.
Pero no tur cos di cacao ta bon; mester corda cu chuculati por ta toxico pa nos bestianan di cas, specialmente pa cachonan y pushinan.
Awor si, ban sali y busca un dushi chuculati pa celebra e dia aki.
