Amanda Bynes a bolbe Instagram, y ta parce cu el a siña par di cos mientras el a atende scol di moda.
Despues di gradua di California’s Fashion Institute of Design and Merchandising, e actriz a cambia su cuenta di red social, yamando esaki ‘Matt Black Online Store’ na juli ultimo, y no a post nada desde cu a elimina tur su potretnan anterior. Casi tres luna despues, e ta back online cu un estilo nobo.
Den weekend, Amanda a sorprende su fanaticonan compartiendo un potret di su mes cu cabey preto cu puyino, jeans kibra y un caminsa geel cu preto. Sinembargo, e actriz no a comparti un texto y a deshabilita comentarionan.
Pero na cuminsamento di september, prometido di Amanda, Paul Michael a post un potret inusual di e pareha, cu e texto ‘Baby luv luv u’.
Nan relacion ta bayendo bon desde cu Amanda a introduci Paul na mundo durante un video riba Instagram na februari. Den e mesun clip el a pidi disculpa pa su comportamento den pasado, incluyendo comentarionan controversial tocante Hitler, bisando cu Chris Brown a maltrata Rihanna ‘pasobra e no tabata suficiente bunita’, y bisando cu e tabata djis sigui ‘hende bunita’ riba rednan social.
“Mi djis kier a post un video pa bisa sorry na tur hende cu mi a yama mahos riba Twitter”, el a bisa, para banda di Paul den e video. “Mi tabata sinti mahos e tempo ey y tabata dificil pa mi expresa mi mes e tempo ey pasobra mi tabata droga. Awo cu mi a keda sobrio pa mas cu un aña mi kier laga boso sa cu mi stima boso y mi ta contento awo.”
