Amalin Flanegin di Bureau Integriteit: “Aruba mester tin institucionnan fuerte contra corupcion”

Via un Decreto Gubernamental dia 1 di october di 2018 a ser institui Bureau Integriteit Aruba, cu tin e mision di salvaguardia y promove integridad den gobierno, su institucion y empresanan, hunto cu empleado publico y demas trahadonan den gobierno, y den e institucion y empresanan.

Bon Dia Aruba a tene un entrevista cu Amalin Flanegin, ‘kwartiermaker’ of lider di proyecto di e instancia aki. El a splica cu e entidad aki mester ta mas independiente posibel. Den un reunion cu e tabatin cu Prome Minister Evelyn Wever-Croes, Flanegin hunto cu un comision consehero riba e tereno aki, a conseha pa pone e constitucion di Bureau Integriteit den un ley pa asina e tin miho continuidad.

Di mesun manera, Flanegin a expresa cu Aruba ta un pais cu tambe kier ta integro, cu tur persona mester traha cu integridad pa por tin paz y husticia, cu e pais mester tin institucion fuerte contra corupcion.

Flanegin a splica cu esey tambe ta un di e metanan di desaroyo sostenibel pa cual Nacionnan Uni ta boga, y cu gobierno a pone den su Acuerdo di gobernacion na 2017 cu lo kier a bin cu un departamento cu ta pone enfasis y ta traha riba prevencion di violacion di integridad, pa asina no mester di tuma accion contra esey.

Segun Flanegin, integridad mester conta pa tur hende: “Nos no por t’ey solamente pa sector publico, pa ambtenaar of otro empleado; e mester conta pa Hefe, Minister, Parlamentario, tur persona cu tin cierto posicion na nos pais, nan tur mester cu cumpli cu leynan di e pais.”

Un di e tareanan di Bureau Integriteit cu cual a cuminsa, tabata crea un campaña di conscientisacion cu lo cuminsa 15 di augustus proximo, pa traha riba prevencion y tambe informa comunidad, cu e plan ta pa bay traha riba e oficina di conseho, trahando riba maneho pa por presenta plannan pa futuro, con pa evita violacion di integridad.

Den gobernacion, ora un situacion a bay robes of un persona ta mira algo cu no ta bon, e mester reporta esey na su hefe directo, cu mester haci un investigacion. Si e hefe no ta haci nada cu e ‘melding’ e ora ey e persona por acerca Bureau Integriteit cu su keho o denuncia; e ta un proceso cu mester bay via e canalnan regular.

“E intencion no ta cu Bureau Integriteit ta bira e caminda cu tur hende ta bay notifica tur cos, e ta bay pa violacionnan di integridad,” Flanegin a sigura.

Di otro banda, el a informa cu tambe ta existi casonan di ambtenaar cu ta haci algo cu no ta corecto, y no tin hefe, ni un departamento di gobierno envolvi, manera ora un ciudadano comun ta ripara un situacion cu por ta contra integridad, pero e no kier bay Polis, na e momento ey tambe por notifica Bureau Integriteit.

Tambe el a comenta cu nan ta bay purba pone den e ley con pa salvaguardia hende cu ta traha den gobierno, pa motibo cu hopi biaha nan ta haya medida contra nan pa a denuncia (e ‘klokkenluider’), pa por brinda nan proteccion ora nan haci denuncia di algo cu no ta bon.

Flanegin a menciona cu su tarea ta pa pone e departamento den operacion; pa e por funciona mester hende pa traha, pero e ta bisa cu nan ta “hopi cuidadoso” cu esey, pa motibo cu nan no kier hende cu lo bin traha cu otro meta, cu no ta cumpli cu e rekisitonan di e ley of decreto cu lo bin.

El a informa cu nan tambe lo traha cu Ministerio Publico, pa ora un caso tin cierto aspecto penal, nan tin un convenio cu MP pa por facilita informacion lihe y pa nan por actua.

Pa finalisa, Amelin Flanegin a expresa cu e ta spera cu Bureau Integriteit lo haya sosten di tur hende den comunidad, pa motibo cu ta bon pa traha riba prevencion y cu esey ta bay yuda e pais bira miho.