(AP) – Amal Clooney ta un di e expertonan legal cu a recomenda pa e fiscal hefe di corte top pa crimennan di guera pidi un ordo di aresto pa Prome Minister di Israel Benjamin Netanyahu y e lidernan di e grupo militante Hamas.
E abogado di derechonan humano y casa di actor George Clooney a skirbi di su participacion den un carta dialuna riba e website di e pareha su Clooney Foundation for Justice. El a bisa cu su persona y otro expertonan di ley internacional unanimemente a keda di acuerdo pa recomenda pa fiscal hefe di International Criminal Court Karim Khan pidi e ordonan.
Khan a anuncia cu intencion di haci esaki riba dialuna, bisando cu e accionnan di ambos e lidernan di Israel y Hamas den e guera di 7 luna ta categorisa como crimennan di guera.
“Mi a forma parti di e panel aki pa motibo cu mi ta kere den e poder di ley y e necesidad di proteha e bidanan civil,” Clooney a skirbi. “E ley cu ta proteha ciudadanonan den guera a ser desaroya mas di 100 aña atras y ta aplica na tur pais den mundo sin importa e causa pa e conflicto.”
E panel forma pa expertonan den ley humanitario y ley criminal internacional y dos di su miembronan ta ex hues di tribunalnan criminal na Den Haag, unda ICC ta basa, Clooney a skirbi. El a agrega cu nan decision tabata unanime. E panel tambe a publica un op-ed tocante su recomendacion den Financial Times riba dialuna.
Un panel di 3 hues na ICC lo dicidi si lo otorga e ordonan di aresto y permiti e caso sigui dilanti. E hues tipicamente ta tuma 2 luna pa haci e tipo di decisionnan aki.
Den su anuncio riba dialuna, Khan a acusa Netanyahu ademas di oficialnan di Israel y lidernan di Hamas di crimennan di guera y crimennan contra humanidad na Gaza Strip y Israel.
Netanyahu y otro lidernan di Israel a condena e movida como antisemitico. President di Merca Joe Biden tambe a critica e fiscal y a sostene Israel su derecho di defende su mes contra Hamas.
Israel no ta miembro di e corte, cual ta nifica cu hasta si duna e ordo di aresto, Netanyahu y Gallant no ta enfrenta ningun riesgo inmediato di persecucion. Sinembargo e menasa di aresto por haci dificil pa e lidernan di Israel por biaha fuera di e pais y Hamas ya caba ta considera un grupo terorista internacional.
E guera entre Israel y Hamas a cuminsa dia 7 di october, ora cu gruponan militante di Gaza a drenta Israel y asesina alrededor di 1,200 persona, mayoria ciudadano y 20 otro persona a ser tuma como rehen.
Desde e tempo aki, Israel a cuminsa un campana brutal pa desmantela Hamas na Gaza. Mas di 35,000 Palestino a ser asesina den e pleitamento, por lo menos mita di nan muhe y muchanan, segun e calculacionnan mas recien di oficialnan di salud di Gaza, ken no ta distingui entre ciudadanonan y militantenan di Hamas.
E guera a causa un crisis humanitario na Gaza, causando cu alrededor di 80 porciento di e poblacion mester a bay for di nan cas y a laga miles di persona den punto di hambruna, segun oficialnan di U.N.
