Alysha Boekhoudt ta un hoben psicologo cu danki na su pasion pa yuda otronan, y pa siña mas di e mente humano, recientemente a funda Wevolve Coaching & Advisory Services. Boekhoudt ta conta Bon Dia Aruba di su infancia, su pasion, su inspiracion y con tur esaki a influenci’e pa yega awe na unda e ta y ta yud’e eherce e profesion di su soño.

Boekhoudt ta conta cu e ta bin di un famia di 5 y cu danki na su famia e por a disfruta di un infancia bunita. Aunke tin hopi di su infancia cu e no ta corda, el a remarca, for di e potretnan cu e ta wak, e storianan cu e ta scucha,y e relacion cu su famia tin cu otro, e ta sinti sigur cu a pesar di no tin mucho memoria, su infancia uno hopi bunita.

El a splica cu e motibo pakico e no ta corda hopi di su infancia ta pasobra cu e ta un persona cu ta deal cu ansiedad. “Te cu mi por corda, full mi bida mi a deal cu esaki. Na jong nunca mi a wordo diagnostica cu esaki, pero door di studia psicologia mi a cuminsa reconoce cu mi tin hopi di e sintomanan di ansiedad y mi a dicidi di bay busca ayudo,” el a indica.

Boekhoudt ta conta cu e ta persona cu semper a gusta baila y semper el a considera baile como un pasion, te hasta cu e la bira un side job. “Ora mi baila mi ta sinti mi ta expresa tur e emocionnan cu mi no ta sinti comodo pa expresa. Es mas, varios biaha mi a experencia emocionnan bin halto ora cu mi ta bailando. Mi ta wak esaki como un arte expresivo hopi bunita.”

A pesar cu awor e tin su diploma den psicologia, e ta subraya, cu esey no kiermen cu estudio tabata algo cu e tabata gusta semper. El a conta cu como hoben su comportacion no tabata esun miho na scol, cual a pone cu el a keda sinta y hasta cambia di scol.

Despues di caba Mavo, el a bay Colegio, cual tambe el a keda sinta un aña y despues di porfin gradua Colegio, el a keda 2 aña sin bay scol. Boekhoudt ta enfatisa cu durante e tempo ey a yega un punto cu el a dicidi cu e ta cla pa bira y actua manera un adulto.

“Na e momento aki mi a dicidi di bay Merca na Coastal Carolina University, pa haci mi Bachelors den psicologia. Mi a logra caba mi universidad di 4 aña den 3 aña. Mi a namora di psicologia y tabata hopi determina y excita pa siña cos nobo,” el a indica.

Su pasion pa psicologia a hib’e te FIU na Miami Florida na unda el a traha 3 luna den un investigacion intenso cu mucha nan cu ADHD. Despues cu el a gradua el a bin back Aruba y haci su Maestria online den Industrial and Organizational Psychology. “Mi ta hopi afortuna cu mi a logra haya un trabao cu mi stima y cu mi ta bon aden,” el a expresa.

Boekhoudt ta enfatisa cu su inspiracion pa studi psicologia, na banda di kier yuda otronan pa no wak hende sufri, locual a insipir’e mas ta pa conoce e mente di un persona, su interes den wak con cada un persona su mente ta traha diferente y kico ta pone cada un persona reacciona diferente.

Ainda despues di mas di 3 aña trahando como un psicologo, el a subraya, tur caso cu e ta atende ta haciele mas y mas curioso di e mente. “Esaki ta un motivacion pa mi sigui haci estudio pa asina mi por compronde y yuda mi clientenan mihor.”

Boekhoudt ta e fundadora di Wevolve Coaching & Advisory Services. El a splica cu mirando e cantidad di hende cu mester di ayudo, ta un di su motivacion nan mas grandi pa cuminsa cu su propio praktijk. A pesar di esey, e ta un persona cu tin hopi idea creativo pa traha cu fundacionnan y comunidad di Aruba y teniendo esaki na cuenta, trahando cu su mesun praktijk priva ta facilita e posibilidadnan aki.

“E meta principal di Wevolve, manera e nomber ta bisa, ta pa hunto nos evoluciona. Ami como psicologo lo duna bo e hermentnan, y hunto nos lo traha pa bo yega na bo meta nan. A pesar di esey, Wevolve ta enfoca no solamente riba tratamento curativo pero tambe riba tratamento preventivo. P’esey nos wordo organisa hopi tayer y charla,” el a indica.

Pa loke ta futuro, Boekhoudt a señala cu normalmente e no gusta pensa asina leu, pero si e mester imagina su mes aki 10 aña, el lo wak un señora di 38 aña cu un famia bunita y contento. Un persona cu ta haci tur dia locual ta hacie contento, y tambe cu ta dedica tempo na su mes y su famia.

Den futuro di Wevolve, e ta wak e como un compania hopi mas grandi y uno cu tin mas cu un psicologo ta traha pa asina nan por atende y yuda mas hende den necesidad. El a agrega cu el lo tin hopi interes den traha cu fundacionnan na Aruba y hasta kisas bin cu proyectonan nobo pa yuda e hende nan. “Plan pa futuro tin hopi, pero tiki tiki mi ta adapta y yega na mi meta.”

Por ultimo, Boekhoudt ta expresa su mensahe pa comunidad: “Bida ta un regalo hopi bunita cu nos a haya. Es mas, e ta un regalo cu tiki di nos a haya. Usa e oportunidad aki pa traha e bida cu abo merece. Kere cu abo merece di tin un bida bunita, pasobra bo ta merece esaki di berdad. Tin biaha cosnan por bay den maneranan cu nos no kier, y nos por sinti cu riba nos mes nos no por handle e. Ta OK, nos ta humano. Acerca bo ser nan keri, of contact un psicologo pa ayudo. Wevolve su porta nan semper ta habri pa bo.”