Siman pasa tabatin un reunion importante di un delegación di Aruba, comision fiho di Koninkrijksrelaties en Buitenlandse Betrekkingen’, cu miembronan di Eerste Kamer di Hulanda. E tema importante di discusion den e encuentro aki tabata landspakket y e retonan cu esaki por trece pa Aruba.

Den e encuentro a papia riba diferente formulanan cu por yuda Aruba mitiga e situacion financiero precario cu nos ta aden. “Remarcabel tabata cu un biaha mas por a scucha cu ‘fusion entre IMSAN y HOH’ no ta un di opcionnan riba mesa. Den e landspakket ta papia claramente di un colaboración (‘samenwerking’”. Ta parce cu fusion ta biba solamente den cabes di director di HOH y cu a costo di tur cos e kier apodera di IMSAN p’asina soluciona e problemanan financiero di Dr. Horacio Oduber Hospital.”

Den e Landspakket nos por lesa cu ta exigi pa baha gasto di e post di manda pashentnan pa exterior. Esaki ta algo cu dr Rajnherc y IMSAN a logra door di baha den dos aña di tempo, e post aki cu un suma di 20 miyon florin. Esaki door di e diferente tratamentonan cu a logra haci na Aruba mes en bes di manda pashentnan pa exterior.

Mi ta sinti cu cada biaha ta purba desbalora IMSAN door di yame un ‘kliniek’ y door di bisa cu HOH ta e unico hospital na Aruba. Lo contrario ta e berdad. Exigencianan pa un ‘ziekenhuis’ ta: Mester por tin overnachting, por baña, come, ricibi bishita. Esaki ta e ‘hotel functie’ di un hospital. Un hospital tin un operatie afdeling, revalidatie afdeling, polikliniek, laboratorium, Eerste Hulp, Ambulance Dienst y un botica. Tur di nan IMSAN tin.

Otro aspecto masha importante ta e acreditacion, pa por bira un hospital. Según reglanan internacional, solamente institutonan cu ricibi reconocimento di autoridad concerni (Minister), por yama nan mes un hospital.

Mi ta kere cu Aruba mester para fuerte pa IMSAN y no acepta cu kier desacredita e funcion di IMSAN, solamente pa motibo di su tamaño.

E maneho hiba e ultimo añanan na IMSAN a percura pa e crea un nomber riba su mes. El a habri espacio pa Aruba por habri porta pa turismo medico. Tur esaki den menos di un década, cu ta algo cu mester reconoce.

IMSAN tin e tamaño husto pa por atende e pashentnan cu un servicio di cinco strea, manera a stipula for di momento cu a cambia su orientación.