Alvast a instrui su abogado pa para e caso den Corte cu mester a tuma luga dia 25 di Maart. Esaki den luz di e sentencia cu SIWA a haya riba e reduccion di salario. Esaki Raymond Maduro di sindicato ALVAST a bisa.
ALVAST a dicidi pa entama un caso contra gerencia di Elmar pa a corta 12.6 porciento den salario y beneficio di trahadonan di Elmar.
“Mirando cu diaranson 10 maart, Corte a duna veredicto di e caso sumario di SIWA y VWI contra WEB, relaciona cu entrega di 12.6% di salario, directiva di Alvast a notifica nos abogado pa para e caso entre Elmar y Alvast.” Maduro a bisa cu e retencion di salario ta na beneficio di gobierno, specificamente pa e fondo di FASE. “E caso mester a tuma lugar dia 25 maart , y lo informa gerencia di Elmar pa ainda bay mesa y papia ariba e diferente opcionnan, pa asina yega na e entrega di 12.6% efectivo pa aña 2021.”
Den e veredicto di Diaranzon, Huez a considera cu trahadonan di WEB mester sigui contribui temporariamente den e fondo di FASE, den luz di e situacion serio di Pais Aruba y condicionnan cu Hulanda a pone pa e sosten di likides. Sinembargo, aunke cu a para e caso, Alvast a informa gerencia pa partidonan bay mesa y yega na un acuerdo pa e reduccion.
