Ayera mainta alumnonan di St. Augustines School Mavo na San Nicolas a manifesta contra e directiva di scol. E alumnonan no ta mucho contento cu e reglanan cu e scol ta stipula, anto a entrega un manifiesto di ocho punto cu SKOA conhuntamente cu e scol lo bay dialoga riba dje.

Bon Dia a purba haya un reaccion for di e scol mes cu a nenga di duna nos comentario y referi nos na SKOA. Un alumno di San Augustine ta conta Bon Dia cu nan a protesta ayera pa motibo cu e scol a bini cu yen di regla riba cosnan cu nan no mag di haci. Manera cu nos no mag di tiña cabey di color y mucha homber no mag tin piercing. Mucha muhenan no por bisti short kibra pa motibo cu e ta supuestamente esey ta atraccion na nos curpa. Cantina ta bay stop di bende mangel pa nos come mas saludabel anto mester bin cu maleta cu ta hopi pisa. Nan no ta wak esey e alumno ta splica Bon Dia.

E ta sigui conta nos cu no por ehempel ordo un pizza ora un alumno haci aña na e scol, no por sali bay ningun caminda cu e klas, y no mag di bisti otro uniform. Ningun di e reglanan ey ta afecta nos estudio, e alumno ta comenta. Directora di SKOA Josette Daal ta informa Bon Dia cu nan ta poniendo atencion riba e puntonan di preocupacion di e alumnonan. SKOA a pidi un espacio pa e scol por reuni cu su docentenan anto pa wak na kico por yega, teniendo na cuenta cu e puntonan di e alumnonan. Daal: “Diaranson lo mi bay bek. Mi a papia cu un representante di e grupo di studiante cu tabata dos alumno di examenklas. Mi a pidi na pues pa duna nos espacio pa wak kico e situacion ta pa nos bini na otro.”
Reglanan di scol
SKOA a haya e manifiesto como tambe e buki di informacion di 2016/2017 di e scol. E directiva di e scol y maestronan a repasa e informacion aki unda tin e reglamentonan di scol. Y no a bin ningun cambio. Si mi wak e reglamentonan di scol y puntonan cu alumnonan ta trece dilanti, ta un cuestion di tene bo mes na regla, sra. Daal ta bisa nos. SKOA ta bao di e impresion cu mayoria di e puntonan cu e alumnonan a trece dilanti ta regla caba den e reglamentacion di e scol. Pues e cuestion ta pa wak si ta nan no kier tene nan mes na regla of si e scol no a mantene su mes na esaki. Pues esey ta bay ta e combersacion cu e studiantenan.

Puntonan di preocupacion di alumnonan.
Den e reglamento ta para cu pa cada aña escolar tin un color di uniform. Pero e muchanan ta señala cu pa nan e logo ta importante anto no e color segun SKOA.
“Si mi por compronde bon, e directiva di scol den pasado no lo a tene su mes na e puntonan akinan. Pasobra e muchanan ta bisa cu nan no tabata tene na mes cu tal aña escolar tin tal color. Awor e ta un reglamento, mi mester haci mi huiswerk tambe pa wak bek den tur Mavo scol di SKOA tin un color so di uniform pa aña escolar. Den e caso di nan kisas nan no a tene e regla ey vigente”, sra. Daal ta bisa. Un di e otro puntonan ta Wifi. Hopi mucha no tin wifi na cas y ora di bin scol nan kier tin esaki pa tin acceso na dje. Esaki ta un cuestion tecnico pasobra nos scolnan di SKOA no ta cla ainda cu tur scol tin Wifi. Tin un par scol tin wifi, y esey ta locual nos mester papia y splica e alumnonan. Un otro punto cu pa SKOA nan ta pensa ta un mal entendimento ta cu e scol ta exigi pa bin cu maletin enbes di rugtas.

Sra. Daal ta sigui bisa, “Mi mester bisa si cu hopi biaha hende ta pensa cu mucha di scol ta demostra y falta respet. Pero esaki a bay bon organisa y nan ta studiante, nan ta muchanan grandi caba cu nos mester scucha y yega na un acuerdo. Pero no mester kita afo si y mester tene na cuenta cu scol tambe ta forma un studiante. Bo ta wordo forma y tin cierto reglanan di conducta, reglanan representativo cu bo mester forma e mucha di esey. Anto esey ta e combersacionnan cu lo tuma luga diaranson.”