Alumnonan di scolnan publico mester paga 30 florin pa un consulta momento cu nan ta meld malo.
Esaki ta conta solamente ora nan ta ausente pa Centraal Proefwerkweek sea examen di scol of e examen central. Dienst Publieke Scholen a cera un acuerdo cu e compania priva Medwork Caribbean pa haci e trabou aki. Entre otro Colegio San Nicolas (riba potret por mira un alumno cu a slaag na mei) mester cumpli cu e reglanan nobo aki.
Esaki ta nifica cu alumnonan cu ta meld malo mester bay e compania aki pa un consulta unda ta examina si e alumno realmente ta malo y no por cumpli cu e testnan. E compania ta haci e control medico y esaki ta trece gastonan, den sentido cu lo cobra 30 florin pa cada consulta. E alumno sea su mayornan mester cumpli cu e suma aki. Tambe e alumno mester presenta cu un ID sea carnet di scol. Despues di e control e alumno lo haya un declaracion di e compania cu e motibonan medico cu ta indica dicon e alumno no por a participa na e e testnan. Den e caso e compania ta evalua cu alumno si ta fit pa haci examen of proefwerk, lo pone esaki tambe dene declaracion.
