Pero mester alternativa
Ayera nos a haya un bon noticia di berdad. Gobierno a dicidi cu no ta bin un parke di molina na Alto Vista. Un decision corecto, mirando e hopi resistencia cu tabatin den comunidad contra e construccion di e parke di molina na e sitio ey. Motibo pa ta contra tabatin varios. Argumento cu posiblemente e molinanan por causa cierto problema di salud dentro di cierto distancia, molester di sonido, contaminacion di horizonte, (mal)uzo di tereno defini como area berde, etc.. Pero tabatin un otro argumento, cu pa hopi ta sobresali, y esey ta cu bo no ta pone nada industrial asina cerca di e kapel di Alto Vista. Y pakico no?
Pasobra bo no mester ta un persona cu un religion pa bo realisa, bo no mester ta un Arubiano di pura sepa pa bo comprende cu e sitio ey tin algo special pa nos tur. Luga di medita pa hende di diferente religion, y hasta pa algun cu no tin, pero cu gusta e ambiente cu ta reina semper ey. Imagina bo e luga sereno aki, domina pa un serie di molina di 140 metro di altura… Y e argumentonan fabrica pa hustifica cu ta ey e mester bin y cu ningun otro sitio lo ta bon. Esey tambe tabata e opinion di e lider di e proyecto, cu na varios ocasion a vocifera esey. Si e ta consecuente, anto e no ta bay traha e parke di molina na ningun otro luga. Pero nos ta kere cu e ta baha cabes y ta settle pa second best. Tabata pa hopi hende tambe incomprendibel cu e gobierno anterior a keda insisti asina tanto cu ta ey e parke nobo mester bin, y ningun otro caminda. Y pakico tanto insistencia? Mas cu tur cos, tabata parce un asunto di impone, di mustra esunnan cu tabata contra, cu ta nan ta manda. Esey tabata asina, nan tabata manda, pero awor ta 2018 y e situacion no ta mescos mas.
Cu esey, a bisa e ultimo palabra den e asunto aki caba? No, pasobra nos tin trabao pa haci. E metanan di logra un economia y un comunidad basa riba un fundamento sostenibel, no tabata y no ta monopolio di e partido berde, cu tabata gusta confundi e diferente significadonan di ‘berde’. E necesidad di move den direccion di e metanan di sostenibilidad mester y por tin un base di apoyo amplio den comunidad y no mester core segun e divisionnan partidario. Y por lo tanto ta importante pa nos sigui traha, dentro di e metanan mas amplio di sostenibilidad, na e meta di cambio pa fuente di energia sostenibel. Y aki nos mester cuminsa cu constata cu nos no a logra tanto desde cu gobierno di e tempo ey, a percura pa e prome parke di molina. E experiencia den maneho di e parke aki tabata positivo, talbes p’esey a bin cu e idea pa crea un segundo parke, pero na otro sitio. Nos no ta conclui cu no mester crea un otro parke di molina, al fin y al cabo na e isla ruman nan tambe ta maneha dos parke, si nan no tin problema insuperabel di maneho di e suministro ey, cu su caracteristica y problemanan cu e por tin, anto nos tambe lo mester por logra.
Sin embargo, tin mas aspecto di considera den e asunto aki. Un di nan ta cu, segundo parke di molina of no, nos mester busca un mix ideal, o cerca di ideal, di diferente forma di energia cu ta compensa mutuamente pa e desbentaha di e otro formanan. Nos niun no mester ta ingeniero specialisa pa comprende esey: biento no ta supla tur ora, solo no t’ey anochi, etc.. Ademas, pa loke ta e produccion di energia electrico, nos mester deshaci di e fuel oil pisa cu nos planta di awa y coriente ta uza. Tanten no tin otro alternativa cu no ta encera uzo di combustibel fosil, mester considera e cambio pa kima gas natural. Unico cos ta, despues di tanto papiamento di gas via e refineria, pa cual lo mester a bin tuberia di e bisiña, cu actualmente no por ni percura pa su mes, corda pa haci algo aki cerca nos, mester pensa riba otro manera pa trece e gas aki. Na e volumen di gas cu WEB mester pa su mes, no mester pensa riba tuberia mes, tin otro manera di transporta.
Pero tin varios otro alternativa pa considera y realmente mester constata cu despues di tur e champagne, cerbes y café latte di e conferencianan berde di ultimo añanan, nos no a yega mucho mas leu ainda. Tin en todo caso un proyecto di energia solar riba tereno di e refineria, loke ta bon, pero mester bin un plan mas amplio pa stimula energia solar na un forma mas individual, pero cu conhuntamente por significa un produccion di energia considerabel. Importante ta, sin embargo, cu nos tin actualmente un partner gubernamental cu posibilidadnan financiero limita. E inversionnan necesario lo mester bin, manera mester ta tambe, di sector priva, local o di exterior. Por logra si nos ta mas practico, ‘menos show y mas go’ e biaha aki.
