(Infobae) – Den un mega operativo, cu a tuma luga ayera den prome oranan di mainta, Polis Nacional di Peru (PNP) a detene cinco persona relaciona cu e organisacion criminal “Los Jefes”. E personanan aki presuntamente tabata dedica na hortamento di combustibel destina pa Ehercito di Peru.

A realisa e procedemento na dos luga, Lima y Huancayo, unda a duna di conoce con e combustibel cu mester a yega na Brigada di Huancayo, nunca a yega na su destino final. Segun, personal di ehercito presuntamente tabata desvia e recursonan aki pa nan beneficio personal, na luga di sigui e protocol estableci pa su distribucion.

Integrantenan di e red aki tabata busca contacto cu e institucion pa logra nan proposito, asina nan a yega te e hefenan. Di acuerdo cu videonan di PNP, por mira e intervencion y detencion di e personanan presuntamente implica den esaki.

Di acuerdo cu investigacionnan, a logra desvia casi 6 mil galon di petroleo, loke ta ekivalente na mas di 13 mil dollar . Te ayera, a bira conoci cu nan a pasa un proceso di identificacion y nan a keda deteni di manera preliminar pa 7 dia.

Entre e detenidonan ta Roberto Percy Huamaní Riveros, general di Brigada den actividad y director di Fabrica di Armanan y Municion d Ehercito; general Jorge Luis Yanac Chávez, Fidel Wilber Mogrovejo Tejada, nan ta suboficial tecnico.

E abogado a manifesta cu Jorge Exsedio tabata fungi como hefe di Abastecemento di Ehercito y e tabata encarga di “firma e carchinan di combustibel cu tabata sali.”

Di acuerdo cu e tesis fiscal, Mogrovejo Tejada tabata e lider di e organisacion criminal aki, mientras tanto, e generalnan ta señala como complice.

Esaki no ta prome biaha cu ta reporta e delito aki den institucion, debi cu na februari di e aña aki, a publica riba medionan local e hortamento di combustibel cu orden di un comandante.

Ademas, segun Ministerio Publico ya caba tabata investiga e caso prome cu lo a bira publico y e hefe di Informacion di Ehercito, Fernando Uribe, a declara cu a “cuminsa un investigacion extenso,” ademas el a sigura cu “e personanan responsabel ta bay haya sancion di acuerdo na e regimen disciplinario di Forsa Arma.”

Den e denuncia aki, un sargento a duna su testimonio clave y tabata involucra e general encarga di dirigi y destina e petroleo.

Durante e operativo tambe a logra confisca documentonan relevante pa e caso, aunke te ayera tabata warda pa un comunicado oficial.