E luna aki departamento di Labor y Investigacion (DAO) a cuminsa un encuesta riba nos mercado laboral. Jason Lejuez kende ta director interino di e seccion di investigacion di DAO a declara na Bon Dia Aruba cu ya caba mil adres di un total di dos mil rond di nos isla a haci e encuesta. E ta un encuesta cu ta cumpli cu e standard di instancia internacional manera Organisacion Internacional di Labor (ILO).
Encuesta
Nan ta na mita di e cantidad di adres cu nan kier a logra y e ta aprecia cu nan ta hayando colaboracion di nos comunidad pa atende cu e encuesta nacional aki. Igualmente ta bon pa tur hende ta na altura cu DAO tin un grupo di 25 encuestadonan – algun di nan cu experiencia y otronan nobo – debidamente uniforma cu nan T-shirt cora y logo di DAO y tambe identifica pa realisa e trabou aki den diferente bario di nos isla.
E meta ta pa bin cla cu e encuesta aki dia 30 di november, pero probablemente nan lo anuncia si tin un siman di prolongacion. Generalmente e ta wordo prolonga, ya cu tin algun adres cu nan no ta haya hende na cas y nan tin cu bay despues of persona cu a keda pendiente pa realisa e encuesta tambe. E ta un encuesta boluntario ya cu e no ta mara den ley, p’esey nan ta pidi e cooperacion di tur hende. “Esaki ta hopi importante pa bo pais. Pa bo pais tin su mes cifranan colecta di e manera adecuado”, el a bisa
Nan meta ta di bishita 2 mil adres cu nan ta calcula cu ta alrededor di 4500 persona di 15 aña bay ariba, cu nan ta bay entrevista pa tin informacion general di nan relata na nos mercado laboral. Sr. Lejuez a indica cu e mustra aki mester ta uno representativo di full nos isla. E ta un muestra arbitrario unda nan ta parti nos isla geograficamente den 25 parti, y nan ta kies e cantidad di adres pa asina tur parti di Aruba ta bon representa den e encuesta aki cu ta uno nacional.
Nan ta garantisa cu tur informacion duna ta keda confidencial. For di 2011 nan ta realisando anualmente e encuesta aki cu ta un instrumento importante pa compila data y asina analisa y evalua e comportacion di nos mercado laboral. Esaki ta nan di 7 biaha cu nan ta bin cu e encuesta aki caminda e privacidad ta keda hopi importante. Encuanto si nos mercado laboral ta cambia constantemente, DAO conhuntamente cu otro instancia manera Banco Central di Aruba (BCA) y Oficina di Estadistica di Aruba (CBS), ta bin cu e tipo di encuesta ki anualmente pa entre otro monitor regularmente e indice di desempleo.
Importancia
E datonan aki ta yuda pa evalua si e maneho pa atende cu e aspecto di desempleo ta dunando resultado. Pa ehempel na aña 2011 nan a midi un desempleo di 8.9%, pero despues na 2012 e tabata na 9.6% cu tabata e aña cu Valero a cera loke a produci un shock den nos e mercado laboral y esaki a wordo refleha den e cifranan di encuesta. Un aña despues el a baha pa 7.6% y na aña 2014 tabata 7.5%. Na 2015 e tabata 7.3% y na 2016 e tabata 7.7%. Kiermen durante e ultimo 4 aña nos indice di desempleo ta mas cu 7%, pero menos cu 8%. E ta mustra un cierto stabilidad den e indice di desempleo, pero te aworaki niun shock manera esun di Valero a sosode. Lo ta interesante pa wak den e encuesta cu ta tumando luga con e cifra di desempleo ta wordo refleha awor cu e proceso di rehabilitacion di e refineria ta tumando luga keto bay.
Encuanto si encuesta aki ta inclui den su cuestionarionan pregunta relaciona cu desempleo den nos sector laboral hoben, sr. Lejuez a bisa cu e encuesta aki su meta ta esun pa midi y bin cu cifra. E cifranan aki lo yuda pa duna forma y contenido na maneho, pero tambe lo yuda pa evalua con e maneho ta bayendo, si e ta dunando resultado si of no. Den e caso aki si esfuerso of maneho ta wordo haci pa baha e desempleo den e hobennan, esaki mester wordo refleha den e cifranan of si ta wordo detecta algo cu ta afecta e sector laboral aki, nan mester bin eventualmente cu un maneho pa dreche.
E cifra di desempleo cerca nos hobennan cu nan a midi na 2016 tabata 17.9% y compara cu 2015 e tabata 18.2%, kiermen un diferencia minimo. Pero na 2011 tabata 22.8%. Sinembargo e cifra ultimo di desempleo di nos hobennan ta keda halto considerando cu nan ta e forsa laboral nobo, pero nan no tin experiencia laboral.
Otro aspecto cu nan ta midi den e encuesta aki ta ki tipo di funcion cu ta realisa esun cu ta trahando. Nan ta bin cu un tipo di clasificacion internacional pa asina compara den cual tipo di funcion e trahadonan ta trahando den dje. Asina nan por haya un idea con nos mercado laboral ta parti entre manager, profesional, trahado basico, etc…
Partnernan
Den e añanan anterior Oficina di Estadistica di Aruba (CBS) tambe tabata realisa encuesta durante cierto tempo. Awor CBS conhuntamente cu DAO y Banco Central Aruba nan ta trahando estrechamente riba tipo di encuesta asina, ya cu e ta demanda hopi esfuerso y nan tur ta wordo beneficia di e datonan aki. Nan envolvimento ta fundamental pa entre otro elabora e cuestionarionan , con pa evalua nan, etc…
Te hasta pa aspecto tecnico y logistico ya cu CBS tin e datonan di tur e adresnan di Aruba y a base di e datonan aki, CBS ta bin cu e muestra pa DAO. Pero tambe den e parti di analisis di datonan nan ta traha den conhunto haciendo uzo di nan profesionalnan pa asina nan tin tur confiansa riba loke ta wordo publica despues. Unabes cu encuesta aki ta bin cla nan ta analisa nan y DAO ta esun cu ta traha e rapport cu ta uno disponibel y accesibel pa tur hende via nan website (www.daoaruba.com), unda ta aparece tur e indicadonan nucleo. E resultado y analisis di e encuesta aki lo bin cla den e prome semester of mita di 2018, ya cu e ta rekeri hopi trabou no solo pa elabora y ehecuta e encuesta sino procesa e datonan y bin cu analisis.
Sr. Lejuez a indica cu nan ta traha cientificamente pa medio di un metodologia pa haci encuesta di forsa laboral cu ta wordo prescribi pa ILO. E instancia internacional aki tin un cierto metodologia pa midi e mercado laboral pa asina facilita e proceso di compara esaki na nivel internacional cu cualkier otro pais. “Esaki ta loke mayoria di pais ta haci. Si bo kier bin cu datonan di mercado laboral y bo kier compara bo mes cu e paisnan internacional, no tin otro manera pa bo por hacie”, el a declara.
E tipo di encuesta aki ta relevante ya cu den un pais su parti mas importante ta su economia, pero e parti mas importante di economia ta e mercado laboral. P’esey instancianan manera CBS y BCA ta hopi interesa riba e tipo di encuesta aki pa nan propio datonan estadistico.
Igualmente sr. Lejuez a bisa cu tur informacion ta wordo procesa di manera anonimo ya cu loke nan kier sa ta informacion di data laboral y no ken e persona ey ta. Ora cu nan ta publica algo esaki semper ta sosode di un manera agrega, kiermen cu ta informacion cu ta indica cantidad of porcentahe, pa ehempel: cuanto hende ta trahando, cuanto hende ta desemplea, kico ta e porcentahe di desempleo, categoria di edad, sexo pa compara hende homber y hende muhe nan participacion den nos mercado laboral, etc…
