Awe nochi cu un concierto magistral ta tuma luga, den cuadro di apertura di e 4 version di Aruba Symphony Festival & Academy (ASF&A) na Cas di Cultura.

E director artistico di e festival, e violinista Simon Gollo a expresa na Bon Dia Aruba su satisfaccion di por congrega un biaha mas un grupo di academico y studiante di musica, pa participa den e festival y academia di musica clasico y contemporaneo na Aruba.

Cada aña e festival tin un caracteristica special. E biaha aki nan ta biniendo cu espacio nobo di presentacion, y nan ta spera mas publico nobo tambe. Nan tin un ‘jam session’ na Cafe Casibari (Paradera). Di e forma aki, nan kier yega na mas publico cu un seccion di variedad di musica Colombiano, Venezolano, Jazz Latino Americano.

Ya caba den nan versionnan anterior, Aruba Symphony Festival  & Academy a realisa concierto na Freewinds Cruise Ship. E aña aki nan a dicidi di extende e tipo di concierto aki na Casibari y tambe nan lo bin cu un concierto na Ritz Carlson hotel, y logicamente riba e Freewinds Cruise Ship tambe. Nan ta otro escenario pafo di Cas di Cultura.

Repertorio musical local
E biaha aki nan a bin cu un repertorio sorpresa di musica Arubiano den genero sinfonico. Sr. Gollo a laga sa cu esaki ta algo nobo. Nan tin varios piesa musical local cu nan lo presenta e dia di e clausura cu lo ta dia 29 di juli.  “Nan ta piesa musical masha importante di Aruba den genero sinfonico. Nos a bin cu areglo exclusivo pa e festival aki di musica Arubano”, e di.

E concierto di apertura cu ta tuma luga awe pa 8or anochi na Cas di Cultura, tin presencia di musico local cu e presentacion di e coro Ars Nova Choir, bou e direccion di e docente di musica, Mayra  Garrido.

“Pa Aruba Symphony Festival & Academy ta importante pa crea espacio na e musiconan local,  y pa e hendenan cu ta realisa bida cultural na Aruba”, sr. Gollo a bisa. E ta considera esaki mas cu ‘logico’, ya cu nan fundacion tin sede na Aruba mes.

Prestigio  internacional
Nan ta sigui trece musiconan internacional di gran prestigio na Aruba. E aña aki tin presencia di participante di Hapon. Nan ta hendenan cu a bin fei otro banda di nos planeta, pa haci musica na Aruba.

Esaki ta un atractivo masha special di e proyecto aki. E biaha aki, alrededor di 80 musico cu a bin fei diferente parti di mundo, y muy specialmente di America Latina, Merca y Asia. E  ta haya cu e presencia di e musiconan aki cada aña ta duna mas peso internacional na Aruba Symphony Festival & Academy, y pa nos isla tambe.

Cuater aña pasa nan a cuminsa cu e proyecto aki como Nuevo Mundo Festival, pero cada aña ta uno yen di experiencia y satisfaccion. Den cuadro di e 4 edicion di e festival aki, nan ta sinti cu e simia cu nan a planta a bira un mata. Aunke e no ta e mata grandi cu nan lo desea, pero ya caba e tin reis profundo,  y nan esfuersonan ta wordo mira y aprecia.

Colaboracion
Nan ta sinti cu nos comunidad a compromete mas cu e proyecto aki.  Tin famianan local cu ta habri e porta di nan cas pa ricibi e hobennan studiante y docentenan di musica como nan huesped. El a expresa su gradicimento pa e gesto aki. Tambe el a expresa cu nan ta hayando e colaboracion di organisacion, manera Unoca y Cas di Cultura. Igualmente personanan y empresanan di e sector priva ta brindando nan colaboracion cu e festival y academia di musica aki.

“Nos ta haci un yamada na e hendenan cu sensibilidad,  cu ta sea di wak crece nan isla y tambe pa nan haya un calidad di bida, culturalmente papiando, miho na Aruba.” Nan ta considera e festival aki como parti evidente di e proceso positivo aki. Sr. Gollo ta haya cu cada aña nan ta avansa den un relacion di aceptacion y apoyo.

E ta considera cu e prome 3 aña tabata uno di construccion rond di e proyecto aki. Awor nan ta cerando un etapa di siñamento, pa bin cu un organisacion mas structura, caminda tur cos tin mas fluidez. “Nos tin e trankilidad y legria cu e no ta un proyecto inicial. Sino cu el a bira un proyecto cu tin continuidad. E proyecto di un festival pa 4 aña na Aruba, e ta bin haciendo su historia caba.”

E ta calcula cu den delaster 4 aña, un total di mas cu 250 studiante di musica di henter mundo  a bin Aruba pa atende nan ‘master classes’. E cifra aki ta importante, pero no solamente nos mester mir’e cuantitativamente pa e participacion di studiantenan, pero mester wak cuanto di nan ta bay pa nan pais bek papiando di Aruba di otro manera, no solamente riba su beyesa natural y atractivo turistico. E ta haya cu esaki ta un forma di promove nos isla, y e tin su impacto. Eventualmente e no ta uno masivo, pero e ta mas di calidad of cualidad. Di otro banda, e docentenan di musica ta hendenan cu ta biaha den henter mundo, dunando concierto,  y nan ta un carta di garantia pa  promove Aruba su turismo.

Festival formativo
Pa e director artistico di e festival aki, e realisacion anual di ASFA ta un proyecto di bida. Sr. Gollo tin un trayectorio musical reconoci como un famoso violinista internacional.  Tur aña e ta realisa presentacion of concierto den diferente pais. Constantemente e ta biaha, recientemente el a bay Suisa, Mexico, Colombia, Brasil, Merca, etc.. Pero e ta haya cu e festival cu nan ta bin realisando na Aruba, ta un oportunidad pa e hobennan local y di afo. Nan por cuminsa cana un caminda den su carera musical y den nan bida personal.

“E ta  un bentana of porta cu ta wordo habri pa nan.”  Ya caba nan tin ehempel di un hoben cu a participa den nan festival. E hoben prometedor aki a gana un beca completo na Merca cu cantidad di oportunidad.  E ta haya cu esaki ta un testimonio conmovedor, ya cu su presencia na Aruba den e festival aki, a contribui pa nan bida a cambia pa miho.

Na final e ta haci un yamada na henter comunidad, ya cu awe nan ta cuminsa un serie di concierto pa 8or anochi na Cas di Cultura. Nan website ta: www.arubasymphonyfestival.com unda nan ta divulga henter nan programa di e Aruba Symphony Festival & Academy  2018. “Entrante awe ta cuminsa un gran fiesta musical di alegria y emocion cu musica ta brinda nos”,  sr. Gollo a bisa na Bon Dia Aruba.