Despues cu na inicio di luna di september, corte di prome instancia di Aruba a dicidi pa declara Excelsior Casino N.V. como oficialmente den bancarota, e decision aki a duna luz berde pa asina un grupo di trahado por reclama nan derecho for di e fondo di cesantia, administra pa Banco di Seguro Social (SVb).
Despues cu e casino aki a cera su porta na april ultimo, un grupo di trahado a keda sin haya su salario, y tambe nan a cay den un incertidumbre, ya cu nan no por a haya nan pago di cesantia. Esaki te ora cu e casino aki ta wordo declara failliet oficialmente, locual a sosode despues di 6 luna cu Excelsior Casino a stop su operacion.
For di siman pasa un yamado a wordo haci na e trahadonan di e casino aki pa nan pasa yena y firma e formulario pa SVb cuminsa procesa nan pago di cesantia. Un parti di e proceso aki a wordo diligencia den oficina di Mediador di Gobierno. Ta wordo calcula cu den total un grupo di 60 trahado a yena nan respectivo formulario di cesantia.
Pago di cesantia
Mediador di Gobierno, Anselmo Pontilius a laga sa cu hunto cu e colabora di e dirigentenan di SVb, e departamento aki a logra haya e formularionan. SVb mes a cuminsa haci e trabao di laga e trahado yena su formulario y trece nan documentonan necesario pa nan cuminsa e proceso pa efectua e pago.
Mediador a indica cu SVb lo paga solamente e añanan di servicio di e trahadonan di acuerdo cu e ley di cesantia. Si e trahado tin 10 aña di servicio, e trahado lo haya loke 10 siman di salario ta nifica, y nan ta hay’e den un solo pago. Pues e no ta inclui vakantie ni otro beneficionan cu e trahadonan tabatin y cu e compania finalmente no por a cumpli cu nan. Pero si ta wordo reduci loonbelasting y primanan for di e pago di nan cesantia.
Pontilius a splica cu esaki ta un proceso cu tin su caracter legal, ya cu cada trahado tin cu yena un formulario, presenta nan payslip di dos luna ultimo, ID, etc… Pa varios dia departamento di Mediador di Gobierno a yuda den e fase aki y aworaki nan ta cla pa entrega e pakete di formulario completo, ya sea diabierna ultimo of dialuna awor.
Riba e di dos fase, SVb ta bay revisa si e informacionnan ta corecto. Pues e trahadonan ta keda pendiente di SVb su informacion riba ki fecha nan ta cuminsa paga nan cesantia di tur nan añanan di servicio.
