Segun informacion cu Departamento di Salubridad Publico DVG a publica riba nan pagina di Facebook pa loke ta trata e porcentahe di vacunacion na nos isla, actualmente tiki mas cu mitad di nos poblacion ta vacuna.
“Aruba ta den pleno campaña electoral y ta custumber cu esaki ta sucede cu hopi aglomeracion y bishita di cas pa cas”, DVG a remarca. “Tin custumber dificil pa cambia, pero salud di un y tur ta importante. Pa nos sigui cuida, e miho forma di haci esaki ta pa vacuna.”
DVG ta informa cu no mester di cita mas pa por vacuna, sino solamente pasa di dialuna pa diabierna na e localidadnan di vacunacion na Santa Cruz of San Nicolas, unda por haci e registracion y tuma e vacuna di biaha. “Vacuna ta un acto di solidaridad y responsabilidad conhunto. Niun por keda atras”, DVG a comenta.
Igualmente, DVG a duna informacion cu e ‘hangua nacional di vacunacion’, esta e porcentahe di e poblacion cu ta vacuna, ta marca 56%. Segun DVG e meta ta pa yega na 85% di poblacion vacuna, ‘pa por normalisa bida mas tanto cu ta posibel’.
Te cu dia 8 di mei pa 7:30pm, DGV a registra un total di 55,744 persona vacuna. Di esakinan, 30,789 a tuma e prome dosis, mientras 24,955 a tuma tur dos dosis. Cu esaki, a aplica un total di 80,699 vacuna.
E meta di 85% di poblacion vacuna ta vincula na virologia, unda ta considera cu si 85% di e poblacion ta vacuna, e riesgo di un brote ta minusculo. Ya cu Covid-19 ta un malesa nobo, no tin persona cu sa ki nivel di inmunidad ta rekeri pa stop transmision di SARS-CoV-2. Sinembargo, director di Instituto Nacional pa Malesa Infeccioso di Merca, Anthony Fauci, a declara cu e ta kere cu entre 70% y 85% di e poblacion mester ta immuun prome cu por considera cu coronavirus ta efectivamente bao control.
