Segun e partido KEM, tin alrededor di 31 mil persona indocumenta na Corsou. E situacion aki ta costando nos comunidad hopi placa, pasobra mayoria di nan no ta pagando impuesto y nan debernan social.
Partido KEM, Corsou Esun Miho, ke mira e personanan riba nos isla sin documento, paga pa bira legal. Esaki ta locual Poeki Alberto di KEM a splica medionan di comunicacion ayera.
Segun Alberto, kende tin aspiracion pa bira mandatario, tur persona sin documento riba nos isla, despues di pasa screening mester paga pa nan permit di estadia y di trabou. En bes di pone nan den Barak, core nan tras henter dia y deporta nan, cual tur ta costando nos comunidad, mester pone esunnan cu por keda paga pa nan estadia riba nos isla.
Segun calculonan di KEM, e ehercicio aki lo pone 460 miyon florin den caha di gobierno pa cada termino di prolongacion colectivo.
