Nathalia Pico kende ta encarga di e seccion comercial di Fundacion Cardiovascular na Bucaramanga (Colombia), caminda hopi pashent di Aruba cu problema di curason y afilia na AZV, ta wordo atendi. Nan ta ricibiendo alrededor di 28 pashent pa luna di locual aproximadamente entre 15 pa 20 ta pashentnan cu problema cardiovascular.
Aruba ta nan principal partner internacional. Nathalia Pico a bisa cu loke nan a logra conhuntamente cu AZV y cu e pashentnan di Aruba ta algo cu nan mustra como un bon ehempel na otro islanan di Caribe. “Berdaderamente e ta un relacion ehemplar na nivel di comunicacion y bon relacion”, el a bisa.
Bon relacion
E ta haya cu nan a logra algo hopi “special” caminda e team medico di cardiologo tanto di Aruba como di nan institucion tin contacto directo. Esaki ta permiti cu e mandamento di pashentnan ta sosode net den e momento indica y tambe nan por hiba un bon evolucion di e pashent unabes cu e ta bin Aruba bek. “Esaki ta permiti cu e pashent lo por sigui nan tratamento den nos pais.
Nan enfoke ta servicio medico cardiovascular, ya cu alrededor di un 85% di e servicionan cu actualmente nan ta ofrece ta servicio cardiovasculas di complehidad halto, ya cu nan ta un clinica top riba e tereno aki no solamente na Colombia sino na Latino America unda nan ta ocupa e di 5 posicion. Nan ta cla pa habri nan centro nobo mas grandi den e region aki di 1.500 cama na Bucaramanga. Nan kier reforsa nan relacion cu Aruba no solamente riba tereno cardiovascular sino riba otro specialisacion.
“Cu e apertura aki di e compleho aki nos ta bay habri otro servicionan entre nan servicio di oncologia, ortopedia, neurologia y cuidado pa hende muhe”, el a bisa.
Specialisacion y calidad
Sinembargo nan specialisacion mas fuerte tin di haber cu asunto cardiovascular unda nan a bin cu hopi innovacion y specialisacion caminda nan a yega di establece un relacion cercano cu e pashentnan di nos isla. Pa medio di AZV nan ta ricibi e pashentnan mas compleho y casonan mas critico y tambe casonan di complehidad intermedio. Mayoria di nan ta pa cirugia y procedemento di emodinamia y recuperacion ambulatorio unabes cu nan ta sali fei di e procedemento medico.
Aruba no ta e unico isla den Caribe cu ta manda pashent pa nan sino Trinidad & Tobago, Corsou y tambe di otro paisnan di Latino America. Actualmente cu nan ta den un proceso di crecemento y cambionan nan ta spera di por fortalece nan relacion cu otro islanan di Caribe y establece nan relacion bek cu islanan cu nan a yega di traha prome.
E institucion aki tin 30 aña di existencia. Nan ta e prome clinica Colombiano cu a wordo acredita pa Joint Commission International cu ta e organisacion mas halto di acreditacion internacional. Nan a wordo reacredita pa di tres biaha e aña aki. Nan proyeccion ta di bira e prome instituto mas importante na Latino America riba e specialisacion medico cu nan ta ofrece. Nan tin un oficina internacional pa brinda ayudo no solamente medico sino logistico pa e pashent y nan famia durante nan estadia den e clinica aki.
Nan tin un team multi disciplinario bilingual disponibel pa nan pashentnan internacional. Nan tin nan propio flota aereo medico locual ta permiti e transporte di pashent den un estado critico fei di e pais unda e ta ya sea Caribe y Latino America, cu un team specialisa den cuido medico critico. “Nos ta e unico hospital na Colombia cu tin e servicio aki. E ta un balor agrega di nos fundacion”, el a bisa.
Finalmente el a señala cu Bucaramanga ta un ciudad ideal pa aloca e pashent y nan famia. E ta un ciudad safe y bon organisa cu ta conociendo un desaroyo positivo na Colombia. Na 2015 a bira e ciudad cu menor indice di pobresa.
